Óskemendegi sarǵaıǵan qar eldi alańdatty
ÓSKEMEN. QazAqparat - Óskemenniń Sol jaǵalaý aýdanynda qardyń ashyq sarǵysh túske boıalýy eldi alańdatyp otyr. Turǵyndar 2 aptadan beri jaǵymsyz ıiske tunshyǵyp júrgenderin aıtyp, ekologııalyq qaýipsizdik ortalyǵyna shaǵymdandy, dep habarlaıdy QazAqparat tilshisi.
Ýlıanov kóshesindegi 86 úıdiń aýlasyndaǵy gaz qoımasynyń mańaıynda qardyń ashyq sary túske enýi jurttyń kúdigin týǵyzsa kerek. Turǵyndar eki aptadan beri aýlada jaǵymsyz ıis paıda bolǵanyn sezingen. Oblystyq ekologııalyq qaýipsizdik ortalyǵynyń mamandary «Kazgıdromet» mekemesimen birge qar túsiniń ózgerý sebebin anyqtamaqshy.
«Bizge búgin turǵyndardan shaǵym tústi. Estigen boıda ekologııa departamenti men qalalyq tótenshe jaǵdaı mamandaryna habarlastyq. «Kazgıdromet» mekemesi men bizdiń mamandar atalmysh aýmaqtan qar synamalaryn alýǵa ketti. Turǵyndardyń aıtýynsha, eki aptadan beri aýlada jaǵymsyz ıis paıda bolǵan eken. Onyń gaz saqtalatyn ydystarǵa qatysy bar-joǵyn da tekserip kóremiz» - deıdi ekologııalyq qaýipsizdik ortalyǵynyń dırektory Gennadıı Koreshkov.
