Óskemendegi maı zaýytynda órt shyqty
ASTANA. QazAqparat - Qutqarýshylar Óskemendegi maı zaýytynda tutanǵan órtti sóndirýde, dep habarlaıdy «QazAqparat» HAA Shyǵys Qazaqstan oblysynyń Tótenshe jaǵdaılar departamentiniń baspasóz qyzmetine silteme jasap.
«08.30-dar shamasynda Óskemen qalasy, Rıga kóshesindegi maı zaýytynyń aýmaǵynda órt tutanǵan. Torfty materıal, qoıma ǵımaratynyń qabyrǵalaryna japsyrylǵan jylytqyshtar órtengen. Tilsiz jaý 144 sharshy metrdi sharpyǵan», delinedi mekeme habarlamasynda.
Órtti sóndirýge ShQO TJD «Órtti sóndirý jáne apattyq-qutqarý jumystary qyzmeti» MM-niń 40 qyzmetkeri men 11 tehnıkasy jumyldyrylǵan. Gaz-tútinnen qorǵaý qyzmetiniń eki bólimi jasaqtalyp, órttiń kórshi tsehtarǵa ótip ketýinen saqtaý úshin ishkerige enip, órt oshaǵynda jumys júrgizdi.
Sondaı-aq eki órt sóndirý uńǵysy ǵımarattyń qabyrǵalaryn qorǵaýǵa jiberilip, shatyrdaǵy órtti sóndirýge bir uńǵy bólindi. Oqys oqıǵanyń shyǵý sebepteri zerttelýde. Qurbandar men zardap shekkender joq.
