Óskemendegi kópirdiń qulaýyna qatysty prokýratýra qylmystyq is qozǵady

ÓSKEMEN. QazAqparat - Óskemende Ertis ózenindegi kópirdiń eski bóligi qulaýyna qatysty oblystyq prokýratýra QR QK 277-baby boıynsha (taý jáne qurylys jumystaryn júrgizýde qaýipsizdik erejelerin buzý) qylmystyq is qozǵady, dep habarlaıdy QazAqparat tilshisi.

Qadaǵalaý organy oqıǵanyń naqty sebepteri men jóndeý jumystaryna jaýapty tulǵalardyń kinásin anyqtaý úshin sharalar kesheni júrip jatqanyn basa aıtyp ótti. Ázirge kólikter men jaıaý júrginshiler ótip jatqan jańa kópir konstrýktsııasynda da aqaý bar deýge esh negiz joq. Oqıǵa ShQO prokýrory Baǵban Taıymbetovtyń erekshe baqylaýyna alyndy.

Eske sala ketsek, búgin 09:41-de jóndeý jumystary ýaqytynda kópir aralyǵynyń konstrýktsııasy sol jaqqa qaraı qısaıyp, saldarynan kópirdiń eski bóligi qulady. Qalpyna keltirý jumystary júrip jatqandyqtan, ondaǵy kólik pen jaıaý júrginshiler qozǵalysy toqtap turǵan.

Oqıǵadan eshkim zardap shekpedi. Tek kópir qurylysymen aınalysatyn uıymnyń eki jumysshysy kópirdiń qısaıǵan bóliginde qalyp qoıdy. Taǵy bir jumysshynyń aıaǵyna zaqym keldi.

Oqıǵa ornynda avarııalyq qutqarý jasaǵy, «Órt sóndirý jáne avarııalyq qutqarý jumystar qyzmeti» qutqarýshylary jumys júrgizýde. Qutqarýshylar arqannyń kómegimen 2 er adamǵa jerge túsýine kómektesti jáne olardyń ómirine tóngen esh qaýip joq.