Óskemendegi kólik qulaǵan shuńqyr ázirge bitelmeıdi
ÓSKEMEN. QazAqparat - Óskemen qalasynyń ákimdigi shahar shetindegi úlken shuńqyr tek kúzge qaraı biteletinin aıtty, dep habarlaıdy QazAqparat tilshisi.
26 sáýir kúni Óskemenniń irgesindegi Menovnoe aýylynda «Prıora» jeńil kóligi jol shetindegi tereń shuńqyrǵa qulap, tóbesimen aýdarylyp túsken bolatyn. Abyroı bolǵanda kólikte júrgizýshiden basqa adam bolmaǵan. Qutqarýshylar keptelgen kólikti krannyń kómegimen alyp shyqqan.
Qala ákimi Jaqsylyq Omar atalmysh shuńqyrdy biteý ázirge múmkin emes ekenin aıtady.
«Menovnoe aýylynyń sý qubyrlaryn jańalaý ondaǵan jyldan beri aıtylyp kele jatyr. Turǵyndardyń kópten kútken armany tek bıyl iske asyp jatyr. Siz surap otyrǵan shuńqyr sol sý qubyryn aýystyrý kezinde paıda bolǵan. Biz oqıǵanyń qalaı bolǵanyn beınejazbalardan qaıtalap kórdik. Kólik ıesi qatty kelip, burylysta tizginge ıe bola almaı qalǵany aıqyn kórinip tur. Ol azamattan ázirge eshqandaı shaǵym túsken joq» - deıdi J.Omar.
Onyń aıtýynsha, Menovnoe aýylynyń júrgizýshilerine kúzge deıin burynǵydan muqııat bola turýǵa týra kelmek. Óıtkeni qubyr jańalaý jumystary aıaqtalǵansha qazylǵan shuńqyrlar tolyq bitelmeıtin kórinedi.
«Joba kúzge qaraı tolyq júzege asyp bitýi tıis. Paıda bolǵan shuńqyrlar sol kezde tolyq biteledi» - deıdi qala basshysy.
