Óskemendegi qoqys órti aýany lastaýda – ekologtar
ÓSKEMEN. QazAqparat – Óskemendegi qoqys polıgony órtendi. Ol sóndirilgenmen qoqystan shyqqan tútin úsh kúnnen beri basylar emes. Ekologtar aýada hlorly sýtektiń mólsherden tys deńgeıge jetkenin habarlady, dep habarlaıdy QazAqparat tilshisi.
11 tamyz kúni Óskemenniń irgesindegi Shmelev Log aýylynda kúltóbeden órt shyǵyp, erteńinde sóndirilgen bolatyn. Jalyn basylǵanmen, byqsyǵan tútin basylar emes.
«Qazir órt bolǵan aýmaq tolyqtaı kúzetke alyndy. Qoqys alańynda qopsytý jumystary júrip jatyr. Jańbyrsyz aýa raıy men jeldiń qalaǵa bet túzeýi jaǵdaıdy ýshyqtyryp tur. Órt aýmaǵyn aıqyndaý qıyn. Óıtkeni, qoqystyń asty janyp jatyr», - deıdi Óskemen qalasy tótenshe jaǵdaılar basqarmasynyń Azamattyq qorǵanys bóliminiń basshysy Valentın Lıtvınenko.
Ekologtardyń sózine qaraǵanda, birneshe kún boıy byqsyǵan tútin qalanyń aýasyn lastap jatyr.
«Memlekettik ekologııalyq qurylymdardyń aýa synamalaryn alǵan, almaǵany týraly aqparat joq. Al Ekologııalyq qaýipsizdik ortalyǵyna tıesili avtomattandyrylǵan ólsheý júıesi aýada hlorly sýtektiń mólsherden artqanyn anyqtady. Bul qoqystyń áli de janyp jatqanyn rastaıdy. Qaladaǵy avtomattandyrylǵan ólsheý quraldarynyń barlyǵynda aýanyń lastanýy tirkeldi. Hlorly sýtektiń artýy shetin jaǵdaı bolmasa da, turǵyndarǵa asa qajet bolmasa, syrtqa shyqpaýǵa keńes beremiz», - deıdi Ekologııalyq qaýipsizdik ortalyǵynyń mamany Elena Polıantseva.
