Óskemendegi Kırovtyń eskertkishi turǵan saıabaqqa Qasym Qaısenovtyń esimi berildi
ÓSKEMEN. QazAqparat - Shyǵys Qazaqstan oblystyq máslıhaty aımaqtyq mańyzǵa ıe birneshe qalalardyń kóshelerin qaıta ataý jobasyn maquldady, dep habarlaıdy QazAqparat tilshisi.
Buǵan deıin birneshe satydan ótip, aqyry respýblıkalyq onomastıkalyq komıssııanyń qaraýyna túsken birneshe nysannyń jańa ataýyn oblystyq máslıhat depýtattary bekitti. Voroshılov - Shákárim, Revolıýtsıonnaıa - Qalıhan Ysqaq, Ordjonıkıdze - Saǵadat Nurmaǵambetov, Dzerjınskıı - Ámire Qashaýbaev, Oktıabrskaıa - Muhamedjan Tynyshpaev, Komsomol kóshesi - Jastar bolyp ózgerdi. Al Kırovtyń eskertkishi turǵan «Jastar» saıabaǵyna Qasym Qaısenovtiń esimi berilmek. Eki jyl buryn atalmysh eskertkishtiń ornyna partızan jazýshynyń eskertkishin qoıý týraly bastama da kóterilgen bolatyn.
Oblystyq tilderdi damytý basqarmasynyń onomastıka bóliminiń basshysy Roza Tólemisovanyń aıtýynsha, byltyr bastalǵan onomastıkalyq jumys búgin sońǵy kezeńnen ótken. Endi oblys ákimdiginiń qaýlysy men máslıhattyń sheshimin negizge ala otyryp, Ádilet departamentine tirketý ǵana qaldy.
«Bir Óskemenniń ózinde 37 kóshe men dańǵyl, saıabaqtar kópten kútken ataýlaryna ıe boldy. Oblystyq mańyzǵa ıe Semeı, Rıdderde, Kýrchatov qalalarynda ondaǵa kóshelerdiń aty ózgeretin bolady. Ádilet organyna tirkelgennen keıin baryp, taqtaıshalary aýysyp jańa derekter ortaq bazaǵa túsedi» - deıdi Roza Tólemisova.
