Óskemendegi Gavan aýdanynda turǵyndar evakýatsııalanyp jatyr
ASTANA. QazAqparat - Shyǵys Qazaqstan oblysynyń ortalyǵyn jınalǵan sýdan tazartý jumystary júrip jatyr, dep habarlaıdy QazAqparat ShQO TJD baspasóz qyzmetine silteme jasap.
Dál qazir qalada 32 úı jáne 75 aýla mańyndaǵy aýmaq sý astynda. 12 ýchaskede órt sóndirýshiler men qutqarýshylar jumys istep jatyr. Budan tys, 20 ýchaskege jergilikti atqarý organdary men kommýnaldyq qyzmetterdiń jeke quramdary men tehnıkasy jumyldyrylǵan.
Gavan aýdanynda Shyǵys óńirlik aeromobıldik jedel qutqarý jasaǵy turǵyndardy qaýipsiz jerge kóshirip jatyr. Sý basqan jerden 11 adam kóshirildi, olar óz týystaryn panalady.
Shemonaıha, Glýbokov, Ulan aýdandarynda da sýdan tazartý jumystary júrgizilýde. Qazir oblysta 40 úı jáne 100-den astam aýla mańyndaǵy aýmaq sý astynda.
Qazirge deıin 11 myń tekshe metr sý shyǵarylyp, 3000-nan astam ınertti materıalmen toltyrylǵan qap tóseldi.
Eske sala keteıik, Shyǵys Qazaqstanǵa Pavlodar oblysynyń qutqarýshylary kómekke attanǵan bolatyn.
Erteń, sınoptıkterdiń aıtýynsha, tolassyz jańbyr jaýyp, jeldiń jyldamdyǵy 28m/s-qa deıin jetedi.
