Óskemendegi ekologııalyq problemalardyń «reıtıngi»
ÓSKEMEN. QazAqparat - Shyǵys Qazaqstan oblystyq ekologııalyq qaýipsizdik ortalyǵy 2018 jyly óskemendikter úshin eń ózekti bolǵan ekologııalyq problemalardy atady, dep habarlaıdy QazAqparat tilshisi.
Ekologııalyq qaýipsizdik ortalyǵy BAQ ókilderiniń nazaryna iligip, qoǵamda úlken pikirtalas týdyrǵan túıtkilderdiń ondyǵyn tizipti. Olqylyqtar ondyǵyn «oblys ortalyǵyndaǵy kólik sanynyń shamadan tys artýy» deıtin másele túıindep tur. Statıstıkaǵa sensek, Óskemende tirkelgen kólikterdiń sany 100 myńnan asyp ketken. Ekologtar bul másele BAQ nazarynan tys qalǵandyqtan ǵana sońǵy orynda tur degen pikirde. Al turǵyndar tarapynan ortalyqtyń senim telefonyna qoǵamdyq kólikterdiń ekologııa talaptaryna saı emestigi týraly shaǵymdar kóptep túsipti.
9 orynda sýdyń lastanýy tur. «Bul taqyrypqa jýrnalıster endi-endi qalam terbep júr. Aqpan aıynda Ertistiń birneshe bóliginen óndiristik daqtar baıqalýy el arasynda da qyzý talqylanǵan bolatyn», - deıdi ekologııalyq qaýipsizdik ortalyǵynyń mamany Elena Polıanskaıa. Áıgili Marqakóldiń sýy da laılana bastaǵanyn jergilikti saıttar jarysa jazǵan.
8 oryndy «Maı» AQ-nyń zaýytynda bolǵan órt jeke dara ıelenip tur. Munda óndiristik apat, bolyp, saldarynan bir adamnyń qaza tapqanyn jazǵanbyz.
7 orynda - «ıAdrolyq otyn banki». Bul taqyryp ótken jylǵy reıtıngte tórtinshi orynnan kóringen. Bıyl onyń aınalasyndaǵy áńgime saıabyrsyǵan syńaıly. Degenmen, Úlbi metallýrgııalyq zaýytynyń joǵary baıytylǵan ýrandy qaýipsiz otyn retinde qaıta óńdep jatqanyna saqtyqpen qaraıtyndar áli de kóp.
6 orynda - «Topyraqtyń lastanýy». Atalmysh taqyryp tuńǵysh ret ózekti ondyqqa kirip otyr. Temirjol boıynda mazýttyń jıi tógilýi, «Óskemen eylý elektr ortalyǵy» JShS kásipornynyń «Maı kólshigin» óz qarajatymen joıýy eldi alańdatqan.
5 orynǵa «ólekse» taqyryby shyǵypty. Bul da reıtıngtegi tyń taqyryp. Jyl basynda áýeli Ertis ózeninde úırekterdiń jappaı qyrylýy jurtty eleń etkizgen edi. Vostochnoe aýylyndaǵy depýtattyń shoshqa óleksesin kóshege tastaýy da kóptegen pikirtalastarǵa sebepker boldy. Katonqaraǵaı aýdanynda mal kómilgen orynnan qarasan juǵýy, onyń adam ajalyna soqtyrýy da taqyryptyń ózektiligin arttyrǵan.
4 orynda tramvaı parkiniń taǵdyry tur. Parktiń ıesi aýysqanymen, máseleniń sheshilmeýi kúni búginge deıin udaıy kóterilip júr.
Reıtıngtiń úshinshi ornynda bıyl taǵy da kógaldandyrý máselesi tur. Oblys ortalyǵyndaǵy saıabaqtardyń jeke menshikten memleket balansyna ótýi, qala mańyndaǵy jaǵajaılardy talapqa saı jaraqtaý máseleleri BAQ tarapynan jıi kóterilgen.
«Aýanyń lastanýy» máselesi 2 orynda.
«Bul oraıda resmı organdar men kásiporyndar túrli jaǵymdy sandardy usynǵanymen, qalanyń kók tútinniń qushaǵynan arylmaýy turǵyndardy alańdatyp otyr. Novatorlar kóshesinen «birtúrli kúldiń» tabylýy máselege maı quıa tústi», - deıdi mamandar.
Olqylyqtar ondyǵynyń birinshi satysyna bıyl «kúresinder» taqyryby shyǵyp otyr. Jańa jyldan bastap Qoqys polıgondaryna tógiletin qaldyqtardyń tizimi qysqaratyny, turmystyq qaldyqty suryptap tógý, halyqtyń jańashyldyqqa daǵdylanýy júzdegen maqala men beınesıýjetterge arqaý bolǵan edi.
«Bıylǵa reıtıngke «radıatsııalyq lastaný» máselesi kirmeı qaldy. Degenmen, «Kommendant ózeniniń boıyn abattandyrý», «medıtsınalyq qaldyqtardy kómý» taqyryptary ózektiligin joıǵan joq», - deıdi Eloena Polıanskaıa.
