Óskemendegi Dańq memorıalyn búldirgen 9 jáne 11 jasar balalar bolyp shyqty

ÓSKEMEN. QazAqparat – Óskemen qalasynda polıtsııa qyzmetkerleri Ekinshi dúnıejúzilik soǵys ardagerleriniń qurmetine ornatylǵan Dańq memorıalyn búldirgen vandaldardy tapty, dep habarlaıdy QazAqparat tilshisi.

24 mamyr kúni polıtsııaǵa belgisiz bireýlerdiń Dańq memorıalyn buzǵany týraly aqparat túsken bolatyn.

Anyqtalǵandaı, vandaldar Máńgilik alaýdaǵy jasandy gúlderdi órtep jibergen.

Bunymen qoımaı, janǵan gúlderdi soǵys ardagerleriniń aty-jóni jazylǵan eskertkishke tósegen.

«Qazirgi ýaqytta memorıaldy búldirgenderdiń kim ekendigi anyqtaldy. Ol 11 jáne 9 jastaǵy aǵasy men qaryndasy bolyp shyqty. Olar oınap júrip jasandy gúlderdi órtep, eskertkishke tósegenin moıyndady. Tártip saqshylary balalarǵa jáne ata-anasyna túsindirý jumysyn júrgizdi», - dep habarlady ShQO polıtsııa departamentiniń baspasóz qyzmeti.

Aıta keteıik, jetkinshekterdiń ata-anasy ÁQBtK 127-babyna sáıkes ákimshilik jaýapkershilikke tartylýy múmkin.