Óskemendegi beıimdeý ortalyǵynda bala zorlaý faktisi boıynsha tergeý aıaqtaldy

ÓSKEMEN. QazAqparat – Óskemen qalasyndaǵy beıimdeý ortalyǵynda bala zorlaý faktisi boıynsha tergeý aıaqtaldy, dep habarlaıdy QazAqparat tilshisi.

Óskemendegi kámeletke tolmaǵandardy beıimdeý ortalyǵynda balaǵa qatysty jynystyq sıpattaǵy zorlyq kórsetý faktisi boıynsha tekserý jumystary óz máresine jetti. Bul týraly ShQO aqparat ortalyǵynda ótken baspasóz máslıhatynda oblystyq Bilim basqarmasynyń basshysy Inessa Chernysheva málim etti.

«Búgingi tańda atalǵan fakti boıynsha polıtseıler tolyqqandy tergeý sharalaryn júrgizdi. Barlyq kýáger suralyp, túgel qujattar tekserildi. Quqyq qorǵaý organdarynyń málimetinshe, zorlaý faktisi rastalǵan joq», - deıdi ol.

Eske salsaq, osy jyldyń naýryz aıynda Óskemende beıimdeý ortalyǵynda bala zorlaý faktisi boıynsha tekserý júrip jatqanyn habarlaǵan edik.