Óskemendegi ámbebap vokzaldy kúrdeli jóndeý qajet
ÓSKEMEN. QazAqparat - Óskemende el «ÝK-vokzal» atap ketken avtobeket talapqa saı jumys istemeıtini anyqtaldy, dep habarlaıdy QazAqparat tilshisi.
Oblys ákimi Danıal Ahmetovtiń tapsyrmasy boıynsha qoǵamdyq kólik nysandaryn tekserip júrgen ákimdik ókilderi Myza kóshesinde ornalasqan ámbebap beketten kóptegen kemshilikter tapqan.
Memlekettik qyzmet jáne sybaılas jemqorlyqqa qarsy kúres jónindegi departamentiniń ókilderimen jáne qoǵamdyq uıym múshelerinen quralǵan komıssııa vokzal barlyq talaptarǵa saı emes degen qorytyndy shyǵardy.
Temirjol kompanııasy men avtobýs parkterine birdeı qyzmet etip otyrǵan nysanǵa kúrdeli jóndeý qajet ekeni sońǵy 2 jyldan beri aıtylyp keledi.
«Vokzaldaǵy jalpy qoldanysqa arnalǵan bólmeler aqyly. Bekettiń bas ǵımaratynda da, perrondarda da bir de bir pandýs joq» - delingen departamenttiń baspasóz aqparatynda.
Bul beket arqyly kúnine 3 jolaýshy poıyzy jolǵa shyǵady. Al aýdandarǵa ondaǵan avtobýs aǵylýda. Tekserý matrıaldary «Qazaqstan Temir joly Ulttyq kompanııasy» AQ-na joldandy.
