Óskemendegi aktsııa: qaǵaz ótkizip, ornyna kóshet al
ÓSKEMEN. QazAqparat - Óskemende arnaıy aktsııa uıymdastyrylmaq. Onyń barysynda qaǵaz qaldyqtaryn ótkizgenderge kóshet beriledi, dep habarlaıdy QazAqparat tilshisi.
«Ashyq aspan» kompanııasy qolǵa alǵan aktsııa jazda bastalady. Alaıda, qaǵaz qaldyqtaryn qazirden bastap qabyldaýda. Aktsııaǵa qatysýshy túbirtek boıynsha tańdaǵan kóshetin kez kelgen ýaqytta alady.
«Qaǵaz qaldyqtaryn ótkizgen ár turǵynǵa belgili bir somadaǵy túbirtek beriledi. Ol soma ótkizgen qaǵazdyń kólemine baılanysty. Qaǵazdy qazir ótkizgender aktsııa bastalǵansha túbirtekti saqtap qoıýy qajet. Kóshet sonyń negizinde beriledi» - deıdi kompanııa basshysy Berik Aqtaılaqov.
Aktsııa úshin balqaraǵaı, saǵyzqaraǵaı, shyrsha, arsha, qyzyl emen, jóke, órik, úshqat, qaraqat aǵashtarynyń kóshetteri bólinbek.
Bıiktigi 40 santımetrge deıin jetetin bir kóshet alý úshin 20 keli qaǵaz qaldyǵyn ótkizý qajet.
«Kóshetterdi jergilikti tálimbaqtardan satyp alamyz. Osylaısha otandyq aǵash ósirýshilerdi qoldaımyz, ári qalamyzdy jasyldandyra túsemiz. Qazir mektepter men balabaqshalardy, ózge de mekemelerdi áriptestik orntaýǵa shaqyryp jatyrmyz. Qala halqy bul aktsııany qoldap jatsa, jyl saıyn ótkizýimiz múmkin» - deıdi Berik Aqtaılaqov.
