Óskemendegi 552 avtobýsta elektrondy bıletteý júıesi iske qosyldy

ÓSKEMEN. QazAqparat – Óskemen qalasyndaǵy 550-den astam avtobýsta elektrondy bıletteý júıesi iske qosyldy, dep habarlaıdy QazAqparat tilshisi.

ShQO tsıfrlandyrý jáne arhıvter basqarmasynyń basshysy Marına Gagarınanyń aıtýynsha, tsıfrlandyrý júıesi qyzmet kórsetýdiń barlyq salasyna, onyń ishinde qoǵamdyq kólikke de engizilip jatyr.

«Búgingi tańda Óskemende elektrondy bıletteý júıesi 57 baǵytta qatynaıtyn 552 avtobýsta jáne 4 baǵyttaǵy 28 tramvaıda iske qosylǵan. Sonymen qatar qoǵamdyq kólikte jol aqysyn mobıldi teńgerim arqyly tóleý qyzmeti jumys isteıdi», - dedi ol.

Marına Gagarınanyń málimetinshe, birinshi kezeńde bul servıs №1, 3, 4 tramvaılarynda, №32, 25, 43a avtobýstarynda qoljetimdi boldy.

Osy ýaqytqa deıin uıaly baılanys operatorlarynyń qosymshasy arqyly 1555 ret tólem júrgizilgen.