Óskemendegi 25-shi shaǵynaýdanda jer úıler qurylysy qarqyndy júrip jatyr

ÓSKEMEN. QazAqparat – Shyǵys Qazaqstan oblysynyń ákimi Danıal Ahmetov Óskemendegi 25-shi shaǵynaýdanǵa baryp, kommertsııalyq turǵyn úılerdiń qurylys barysymen tanysty, dep habarlaıdy QazAqparat tilshisi.

Shyǵys Qazaqstan oblysy ákimdiginiń málimetine súıensek, Óskemen qalasyndaǵy 25-shi shaǵynaýdanda jeke turǵyn úıler qurylysy qarqyndy júrip jatyr.

Aımaq basshysy Danıal Ahmetov atalǵan aýdanǵa baryp, sol jumystardyń barysymen tanysty.

«Turǵyn úı ıelerine qurylystyń tórt túrli jobasy usynylyp otyr. Bul - obektilerdi salý kezindegi mindetti shart. Ár úı zamanaýı úlgide salynbaq. Arnaıy jaıly peshter ornatylyp, sharýashylyq júrgizýge tıesili jer aýmaǵy da bolady. Sondyqtan halyq arasynda joǵary suranysqa ıe bolatynyna senimdimin», - dedi ákim.

Sondaı-aq Danıal Ahmetov Jibek matalar kombınaty yqshamaýdanyndaǵy jol aıryǵynyń jobasymen tanysty. Bul jerde bes jol túıisetin bolady.

«Budan bólek, Samar tasjolyna shyǵatyn Bazovaıa kóshesin keńeıtý kózdelgen. Nátıjesinde onyń ótkizý qabileti eki ese artpaq. Bul sharalar joldardaǵy kólik keptelisin aıtarlyqtaı tómendetýge múmkindik beredi. Jaýapty mamandarǵa Esenberlın kóshesindegi nóser kárizin ornatýdy jáne barlyq ınfraqurylymdyq jumystardy aıaqtaýdy tapsyrdym. Astana kóshesiniń júrý bóligin keńeıtý de josparlanýda. Biraq ol úshin aldymen halyqtyń qatysýymen qoǵamdyq tyńdaýlar ótýi tıis. Avrora jáne Pogranıchnaıa kósheleri Nursultan Nazarbaev dańǵylyna deıin keńeıtiledi. Bul Pontonnyı kópirin tıimdirek paıdalanýǵa jáne aýyr tehnıkany qala syrtyna shyǵarýǵa múmkindik bermek. Sonymen qatar jol qurylysshylary Myzy kóshesin keńeıtý týraly usynys bildirdi. Ony qarastyrýǵa daıynbyz, óıtkeni bul aımaqta jol keptelisi jıi bolatyny belgili», - dedi óńir basshysy.

Vıdeodan alynǵan kadr