Óskemendegi jylý tapshylyǵy: Jylý ortalyǵy keńeıtilip, jańa qazandyq ornatylmaq

ÓSKEMEN. KAZINFORM — Óskemen qalasyndaǵy jylý elektr ortalyǵyn keńeıtý maqsatynda iri joba júzege asyrylmaq.

Búginde qalada jylý men elektr energııasy tapshy. Osy máseleni sheshý úshin jylý elektr ortalyǵynyń qýattylyǵyn arttyrý kózdelip otyr.

Qoǵamdyq tyńdaý barysynda jobany júzege asyryp jatqan «Óskemen JEO» JShS ókilderi strategııalyq josparlarymen tanystyrdy. 2028 jylǵa deıin ortalyq aýmaǵynda jańa № 13 týrboagregat pen № 16 qazandyq iske qosylady.

Jańa týrbına qosymsha 100 megavatt elektr energııasyn, al qazandyq saǵatyna 400 tonna bý óndirýdi qamtamasyz etedi. Sonyń nátıjesinde jylý qýaty 130 gıgakalorııaǵa artyp, Óskemendegi jylý tapshylyǵy 331-den 201 Gkal/saǵ deıin, ıaǵnı shamamen 40%-ǵa qysqarady dep kútilýde.

Jobanyń jalpy quny — 140,3 mlrd teńge. Qarjy kózin Eýrazııalyq damý banki arqyly tartý josparlanǵan. Qurylys jumystary qytaılyq seriktestermen birlesip EPC-kelisimshart aıasynda júrgiziledi. Jobalyq-smetalyq qujattamany ázirleýge Qytaı men Qazaqstannyń birlesken konsortsıýmy tartylǵan.

— Bul joba búkil óńir úshin strategııalyq mańyzǵa ıe. Jylý jelileriniń temperatýralyq kestesin kóterip, negizgi jabdyqtardyń tozýyn shamamen 14%-ǵa azaıta alamyz. Sonymen qatar otyn shyǵyny tómendeıdi, — dedi «Óskemen JEO» JShS bas dırektory Danııar Nuǵumanov.

Jobany iske asyrý barysynda 500 ýaqytsha jumys orny, al stantsııa paıdalanýǵa berilgennen keıin 53 turaqty jumys orny ashylady. JEO-daǵy jańǵyrtý barysynda energoúnemdeýshi jáne ekologııalyq turǵydan tıimdi tehnologııalar qoldanylmaq.

Qazirgi tańda qurylys alańynda daıyndyq jumystary bastalyp ketti.

Eske salsaq, osyǵan deıin Óskemende aýa sapasyna 2 kún boıy júrgizilgen tekserýler nátıjesi jarııa etilgeni habarlanǵan.