Óskemendegi jylý ortalyǵynda jóndeý jumystary aıaqtaldy
Óskemen qalasyndaǵy jylý elektr ortalyǵynda jóndeý jumystary aıaqtalyp, daıyndyq pasporty berildi, dep habarlaıdy QazAqparat tilshisi.
«Óskemen JEO» JShS baspasóz qyzmetiniń málimetinshe, jylý elektr ortalyǵy 2023-2024 jylǵy kúzgi-qysqy kezeńde jumys isteýge daıyndyǵyn rastaıtyn pasport aldy. Bul qujatty QR Energetıka mınıstrliginiń Atomdyq jáne energetıkalyq qadaǵalaý men baqylaý komıteti bergen.
«Osylaısha, ortalyqtyń energııa óndirisiniń qaýipsizdigi men senimdiligin qamtamasyz etý úshin qajetti belgilengen standarttar men talaptarǵa sáıkestigi rastaldy. Kúzgi-qysqy kezeńge daıyndyq barysynda JEO-da negizgi jáne qosalqy jabdyqtar boıynsha josparlanǵan jumystar tolyqtaı aıaqtaldy», - delingen aqparatta.
Atap aıtqanda, ortalyqtaǵy №8, 9, 12, 13 qazandyqtar, № 4, 6, 8, 9, 10, 11 týrbınalyq qondyrǵylar aǵymdaǵy jóndeýden, № 11 qazandyq pen № 7, 12 týrbınalyq qondyrǵylar kúrdeli jóndeýden ótken.
Eske salsaq, osyǵan deıin Rıdder jylý ortalyǵynda apta sońyna deıin taǵy bir qazandyq iske qosylatyndyǵy habarlanǵan.
