Óskemendegi jarylystan keıin aýa sapasyn tekserý qorytyndysy qashan shyǵady – Ekologııa mınıstrligi
ASTANA. KAZINFORM – Ekologııa jáne tabıǵı resýrstar vıtse-mınıstri Jomart Álıev «Qaztsınk» zaýytyndaǵy jarylystan keıin Óskemen qalasynyń aýasyna júrgizilgen monıtorıng nátıjesi qashan belgili bolatynyn aıtty.
Májilistiń jalpy otyrysy aıasynda ol jarylys oryn alǵannan keıin Shyǵys Qazaqstan oblystyq ekologııa departamentiniń qyzmetkerleri birden aýa sapasyna tekserý júrgizgenin aıtty. Al «Qazgıdromet» mekemesi «Qaztsınk» zaýytynyń sanıtarlyq-qorǵanys aımaǵynan tysqary jerdegi aýa sapasyna monıtorıng jasaý beketterin ornatty.
- Búginde barlyq synama óńdelip jatyr. Ár synamanyń hımııalyq jáne fızıkalyq zertteý júrgizýge qatysty ózindik reglamenti bar. Menińshe, búgin-aq málimetterdi alyp qalarmyz. Eger iriktelgen saraptamalardyń shekten asý faktisi anyqtalatyn bolsa, onda shtattan tys jaǵdaı saldarynan qorshaǵan ortaǵa kelgen shyǵyn eseptelinedi, - dedi vıtse-mınıstr.
Sonymen qatar ol halyqqa ótemaqy tóleý máselesi qorshaǵan ortany qorǵaý salasyndaǵy ókiletti organnyń quziretine kirmeıtindigin atap ótti.
- Qazirgi ýaqytta «Qazgıdromet» synamalary derekteriniń nátıjesi boıynsha normadan asyp ketý baıqalmaıdy, - dedi Jomart Álıev.
Eske salsaq, búgin tańerteń Óskemendegi kásiporynda jarylys boldy.
Sonyń saldarynan eki adam qaza bolyp, beseýi zardap shekti.
