Óskemendegi jańa jolaıryq qashan tolyq paıdalanýǵa beriledi

ÓSKEMEN. KAZINFORM — Óskemende kópten kútken jolaıryqtaǵy kólik qozǵalysy qaıtadan beton bloktar men ýaqytsha jol belgilerine tireldi.

Óskemendegi jańa jolaıryq qashan tolyq paıdalanýǵa beriledi
Foto: QR Úkimeti

Sátbaev dańǵyly men Jibek joly kóshesiniń qıylysyndaǵy jańa jolaıryqtyń artyqshylyǵyn sezinip úlgergen júrgizýshiler endi jol bóliginiń qaıta tarylýyna tap boldy. Jol ótkeliniń joǵarǵy bóligimen qozǵalys birjaqty tártipke aýystyryldy.

Osydan keıin áleýmettik jelilerde quny mıllıardtaǵan teńge bolatyn jolaıryqtyń qurylys kezindegi aqaýlarǵa baılanysty shuǵyl jóndelip jatyr degen qaýeset tarady. Alaıda salaǵa jaýapty vedomstvo bul aqparatty joqqa shyǵardy.

Qazirgi shekteýlerdiń negizgi sebebi — shetelden jetkiziletin qajetti materıaldardyń keshigýine baılanysty týyndaǵan tehnologııalyq úzilis.

Jańa estakadamen kólik qozǵalysy qurylys jumystary tolyq aıaqtalmaı turyp, synaq rejıminde merziminen buryn ashylǵan. Mundaı sheshim turǵyndardyń ótinishi boıynsha qabyldanyp, joldaǵy uzyn-sonar keptelisti azaıtady dep kózdelgen. Alaıda jolaıryq iske qosylǵan kezde onyń mańyzdy qurylymdyq elementteri — betonnyń temperatýraǵa baılanysty ulǵaıýy men tarylýyn rettep, kópirdi buzylýdan qorǵaıtyn arnaıy deformatsııalyq jikter áli jetkizilmegen edi.

— Qala turǵyndarynyń kóptegen ótinishin eskere otyryp, jolaıryq qurylys jumystary tolyq aıaqtalmaı turyp ashyldy. Qazir onda deformatsııalyq jikterdi ornatý qajet. Bul jumys tehnologııasy kezeń-kezeńimen júrgiziledi. Aldymen qozǵalys jolaǵynyń biri jabylyp, jumystar aıaqtalǵan soń kelesi jolaqqa aýystyrylady. Jikter Eýropada tapsyryspen jasalǵan. Alaıda olardy jetkizý merzimi zaýytta óndirý, logıstıka jáne kedendik rásimderge baılanysty sozylyp ketti. Bul — qurylys barysyndaǵy josparly kezeń. Qandaı da bir kemshilikti túzetý jumystary emes, — dep túsindirdi ShQO jolaýshy kóligi jáne avtomobıl joldary basqarmasynyń óndiristik-tehnıkalyq bóliminiń basshysy Gúldana Ermekova.

Qazir qurylys brıgadalary kópir aralyqtaryn kezekpen jalǵap jatqandyqtan, jolaıryq áli de jumys istep turǵan qurylys alańy sanalady. Sondyqtan munda kólik qozǵalysyna qatysty qatań talaptar saqtalýǵa tıis.

Júrgizýshiler úshin jyldamdyqqa kelesideı shekteýler qoıylǵan:

  • jolaıryqtyń ózinde saǵatyna 40 shaqyrymnan;
  • estakada astyndaǵy aınalma jolaıryqta saǵatyna 30 shaqyrymnan asyrmaý kerek.

Qurylys tehnıkasy men ýaqytsha shekteýlerden jolaıryq tek 2027 jyldyń ortasynda tolyq arylady.

Eske salaıyq, osyǵan deıin Shymkentte jańa jolaıryq ashylyp, áýejaıdyń ekinshi ushý-qoný jolaǵy salynatyny habarlanǵan.