Óskemende jańa mektepter salynyp jatqanyna qaramastan oryn tapshylyǵy áli ózekti

ÓSKEMEN. KAZINFORM – Óskemen turǵyndary úıleriniń janyndaǵy mektepterde oryn bolmaǵan soń, balalaryn ózge mektepterge tasýǵa májbúr. Turǵyndar jańa mektepterdegi oryn tapshylyǵy máselesine shaǵymdanyp otyr.

Balanyń kóptigi sapaǵa áser etedi

Qaladaǵy 19-turǵyn aýdan - qurylys jumystary eń qarqyndy júrgizilip jatqan aýmaqtardyń biri. Jańa úılerge kóbine jas otbasylar qonystanyp jatyr, mundaǵy mektepter oqýshylarǵa lyq toly. Sondyqtan ata-analar balasyn mektepke bererde on oılanyp, júz tolǵanady. 

Buryn №46 men №48 mektep bolǵan. Sodan soń №40 jáne №41 mektepter salyndy. Alaıda bul máseleni túpkilikti sheshpedi. 

- Biz №46 mektepke jaqyn turamyz. Biraq onda bala kóp degen soń birazymyz alys bolsa da, basqa mektepke barýdy uıǵardyq. Sebebi bala tym kóp bolsa, oqý sapasynyń da nasharlaıtyny belgili. Ásirese vırýstyq ınfektsııalar taraǵan sátte ýaıym kúsheıedi, - deıdi Esenberlın dańǵylynda turatyn ata-analardyń biri.

Al keıbireýler kerisinshe alystaǵy mektepke barýy tıis eken.

- Bıyl balamdy qaı mektepke beremin dep bir aı júrdim. Turǵylyqty mekenjaıymyz boıynsha №41 mektepke barýymyz kerek eken. Biraq ol bizge alys. Sol úshin bala sany kóp bolsa da, jaqynyraq turǵan №46 mektepke berdim, - deıdi Áıgerim esimdi shaǵyn aýdan turǵyny.

Sabaq kesteleri uıymdastyrylǵan

Ata-analardyń shaǵymynan keıin №46 orta mektebiniń dırektorymen kezdesip, máseleniń mán-jaıyn surap kórdik.

- №46 mekteptiń jobalyq syıymdylyǵy - 1000 oryndyq. Qazir mektepte eki aýysymda 2000 bala syıyp tur, al jalpy oqýshy sany – 2387, ıaǵnı 387 bala artyq. Biraq bastaýysh synyptardyń syrtqa shyǵatyn esigi bólek. Sabaq kesteleri durys uıymdastyrylǵan, - dedi mektep dırektory Gýlfarıda Aýǵanbaeva.

Onyń aıtýynsha, Óskemendegi 19-shy turǵyn aýdanda kópbalaly otbasylarǵa berilgen úıler kóp. Sol úılerdegi balalardyń basym bóligi osy bilim ordasyna keledi. 

- Byltyr mektebimizde 2680 oqýshy boldy. 412 bala eki jańa mektepke aýysty. Al Ál-Farabı kóshesindegi eki úıdiń balalarymen qosylyp, bıylǵy oqýshy sany 2387 boldy, - dedi mektep basshysy.

Osy rette, ShQO Bilim basqarmasyna da habarlasyp kórdik. 

Belgili bolǵandaı, №46 mektepte 1-synyp 13-ke bólingen. Al osy shaǵyn aýdanda jańadan ashylǵan eki mektepte 1-synyptan alty parallel synypqa deıin oqıdy. 

- №40 jáne №41 mektepterdiń ashylýy №46 mekteptiń júktemesin azaıtty. Jalpy qala boıynsha syıymdylyǵynan asyp ketken 4 mektep bar, olar 825 orynǵa artyq bala qabyldap otyr, - delingen basqarma jaýabynda. 

Ata-analardyń jańa mektepterge kóshýge degen yntasy joǵary bolǵan. Sonyń nátıjesinde bıyl paıdalanýǵa berilgen 600 oryndyq №40 orta mektepte 1083 oqýshy, al dál sondaı qýattaǵy №41 mektepte 905 oqýshy bilim alyp jatyr.

Qoryta aıtqanda, 19-shaǵyn aýdanda jańadan salynǵan mektepter lezde balaǵa tolyp ketti. Sonda da №46 mekteptegi oqýshy sany syıymdylyǵynan asyp otyr. Al qurylysy qarqyndy aýdanǵa kósheıin dep býynyp-túıinip otyrǵan otbasylar áli de az emes. Demek, munda taǵy jańa mektepterdiń salynýy quptaýǵa turarlyq is. 

Eske sala ketsek, buǵan deıin Almaty oblysynda úsh aýysymdy mektepter máselesi qalaı sheshilendigi týraly jazǵan bolatynbyz.