Óskemendegi zaýytta AES-ke otyn tabletkalary qalaı shyǵarylatyny kórsetildi
ÓSKEMEN. KAZINFORM – Óskemen qalasynda ornalasqan Úlbi metallýrgııalyq zaýytta ashyq esik kúni ótip, kelgenderge AES-ke otyn tabletkalary qalaı shyǵarylatyny kórsetildi.
AES qurylysy boıynsha ótetin referendým qarsańynda Óskemendegi «ÚMZ» AQ ashyq esik kúnin ótkizdi. Ýnıversıtet stýdentteri men BAQ ókilderine AES úshin ıadrolyq otyndy óndirý protsesi kórsetildi. Jınalǵandar kórme ortalyǵynda, ýran óndirý zaýytynda jáne «Úlbi-TVS» zaýytynda boldy.
Olardy basqarma tóraǵasynyń birinshi orynbasary – «ÚMZ» AQ bas ınjeneri Vladımır Vahnenko, kórme ortalyǵynyń dırektory Vladımır Dontsov, «Úlbi-TVS» JShS bas dırektorynyń orynbasary – bas ınjener Igor Korobeınıkov, ǵylymı ortalyqtyń basshysy Manarbek Qylyshkanov qarsy aldy.
«Ashyq esik kúni aldaǵy atom elektr stantsııasyn salý jónindegi referendým aıasynda ǵana emes, halyqqa, onyń ishinde jastarǵa Qazaqstan Respýblıkasynyń atom salasynyń ne ekenin túsindirý maqsatynda uıymdastyryldy. Ýran óndirisin aralaý barysynda olarǵa otyn tabletkalarynyń qalaı jasalatyny kórsetildi. Bul tabletkalar Qytaıǵa eksporttalady jáne ol jaqta sátti qoldanylady. Jylý bólgish qurastyrma (JBQ) – atom elektr stantsııalary úshin negizgi otyn. Bir qurastyrmada shamamen 450 keli ýran bar jáne ol reaktorda orta eseppen 5 jyl paıdalanylady», - deıdi Igor Korobeınıkov.
Ýnıversıtet stýdentteri zaýyt jumysyna qyzyǵýshylyq tanytyp, ózderin tolǵandyrǵan suraqtardy qoıdy.
