Óskemendegi sý qoımasynda balyqtyń neden qyrylǵany tekserilip jatyr

ÓSKEMEN. KAZINFORM — Shyǵys Qazaqstan oblysy Ekologııa departamentiniń mamandary Óskemendegi Sogra yqsham aýdanyndaǵy sý qoımasynda balyqtyń qyrylýyna baılanysty tekserý júrgizip jatyr. 

Áleýmettik jelide Sogra yqsham aýdanyndaǵy sý qoımasynda balyqtyń qyrylǵany jaıly aqparat tarady. Soǵan oraı ekologtar sol jerge shuǵyl attanǵan.

Departamenttiń baspasóz qyzmetiniń málimetine súıensek, sý qoımasynan synama alynǵan. Qazir zerthanalyq saraptama júrgizilip jatyr. Sýdyń neden lastanýy múmkindigi anyqtalyp jatyr.

— Júrgizilgen zertteýlerdiń nátıjeleri boıynsha lastaý kózderi, osyǵan qatysy bar tulǵalar nemese uıymdar anyqtalady. Olarǵa Qazaqstan Respýblıkasynyń qoldanystaǵy zańnamasyna sáıkes tekserý sharalary qolǵa alynady. Jaǵdaı departamenttiń baqylaýynda, — delingen aqparatta.

Eske salsaq, osyǵan deıin Mańǵystaýda brakonerlerdiń aýyna túsken óli ıtbalyqtar tabylǵany jaıly jazǵanbyz.