Óskemendegi stýdentter jataqhanasynan órt shyqty
ASTANA. KAZINFORM — Óskemen qalasyndaǵy 30-shy Gvardııalyq dıvızııa kóshesinde ornalasqan stýdentter jataqhanasynyń toǵyzynshy qabatyndaǵy bólmede órt tutanǵan, dep habarlaıdy ShQO TJD baspasóz qyzmeti.
Jataqhana ákimshiligi turǵyndardy jedel evakýatsııalaýdy uıymdastyrdy.
Oqıǵa ornyna jetken TJM qyzmetkerleri jedel túrde órtti sóndirýge kiristi. Qutqarýshylardyń úılesimdi áreketteriniń arqasynda órttiń taralýyna jol berilmeı, 16 sharshy metr aýmaqtaǵy órt tolyq sóndirildi.
— Zardap shekkender joq. Órttiń shyǵý sebebi anyqtalyp jatyr, — delingen habarlamada.
Buǵan deıin Ulytaý oblysynda jeke úıdiń aýlasyndaǵy 100 býma shóp órtenip ketkenin jazǵan bolatynbyz.
