Óskemendegi Shyǵys kenti halqyn tolǵandyrǵan máseleler qandaı
ÓSKEMEN. KAZINFORM — Óskemen irgesindegi Shyǵys kenti turǵyndaryn tolǵandyrǵan másele az emes. Ásirese muǵalimderge ústemeaqy joqtyǵy, dáriger tapshylyǵy men balabaqshanyń qary kúrelmeıtini halyqqa qolaısyzdyq týdyryp otyr. Kazinform osy túıtkilderdiń túıini qashan tarqatylatynyn anyqtady.
«Em izdep qalaǵa ketemiz»
Shyǵys kentinde turatyn halyqtyń deni — qandastar. Ondaǵy úıler de memlekettik baǵdarlama aıasynda shekara asyp, otanyna oralǵan azamattarǵa arnalyp salynǵan.
Kenttiń kezindegi ataýy Nurly kósh bolǵan. Qazir el arasynda áli de bul jerdi Shyǵys emes, Nurly kósh deıtinder az emes.
Jergilikti jurt ózderin ákimdiktiń nazarynan tys qalǵandaı sezinedi. Sebebi olardyń aıtýynsha, qala ákimi sońǵy 6 jylda osynda bir ret qana kelgen.
— Kentke aýyl mártebesi berilmegendikten mekteptegi muǵalimderge ústemeaqy qarastyrylmaǵan. Sonyń zardabyn ustazdar shegip otyr. Sondaı-aq ambýlatorııalyq pýnkte dáriger joq. Syrqattanyp qalǵandar em izdep qalaǵa bet túzeıdi. Medıtsına qyzmetkerlerine emes, emshilerge de qaralyp ketedi, — deıdi turǵyndar.
Shyǵystyqtar balabaqshaǵa aparatyn jol qardan tazalanbaıtyn jetkizdi. Sonyń saldarynan tańerteń kólikter júre almaı, ata-analar balalaryn jaıaý tasýǵa májbúr.
Aýyl mártebesi berile me?
Osy máselelerdiń qashan jáne qalaı sheshimin tabatynyna qatysty Óskemen qalasynyń ákimi Almat Aqyshov jaýap berdi.
— Shyǵys kentin Novo-ıAvlenka aýylyna qosyp, aýyl mártebesin berýge bolady. Sonda másele sheshiledi. Men osy týraly ShQO bilim basqarmasynyń basshysyna aıtyp, «eger solaı istesek, zań boıynsha ondaǵy muǵalimder ústemeaqy ala ala ma?» dep suradym. Ol «ıá. Qaǵaz jumystary aıaqtalǵan soń ústemeaqy tóleý jaǵy ońaı sheshiledi» dep jaýap berdi, — deıdi ol.
Sondaı-aq ákim óz sózinde kenttegi jolǵa jaýapty merdigermen sóılesip, balabaqshaǵa aparatyn joldy qardan tazalatyp otyratyndyǵyn aıtty.
— Dáriger joqtyǵyna qatysty aıtar bolsaq, eń áýeli kentke keletin medıtsınalyq mamandardy tabý qajet. Al ákimdik ol dárigerdi baspanamen qamtýǵa daıyn, — dep jaýap berdi Almat Aqyshov.
Onyń aıtýynsha, aldaǵy ýaqytta Shyǵys kentinde jylý qazandyǵy salynýy múmkin.
— Qazir osyǵan qatysty talqylaý júrip jatyr. Bul kómir jaǵatyn jer úılerdi azaıtyp, qalanyń ekologııalyq jaǵdaıyn jaqsartý úshin de mańyzdy, — dedi qala ákimi.
Eske salsaq, osyǵan deıin ShQO-daǵy kóppáterli úıler 30 jyldan soń ortalyq jylý júıesine qosylǵanyn jazǵanbyz.
