Óskemendegi sarbaz ólimi: Qorǵanys mınıstrligi resmı málimdeme jasady
ASTANA. KAZINFORM — 25 qańtarda Óskemendegi sarbaz óliminen soń Qorǵanys mınıstrligi resmı málimdeme jasady.
- Jyl basynan beri Qarýly Kúshterde áskerı qyzmetshilerdiń qaza tabýyna baılanysty QR Qorǵanys mınıstrliginiń basshylyǵy qaza bolǵandardyń otbasylaryna, týǵan-týystaryna jáne jaqyndaryna shynaıy kóńil aıtady.
Qarýly kúshterdiń basshylyǵy bolǵan jaǵdaıdyń barynsha aýyr ekenin jáne áskerı qyzmet qaýipsizdigin qamtamasyz etý úshin jaýapkershiliktiń tolyq kólemin tereń túsinedi. Qorǵanys mınıstri avıatsııa general-leıtenanty Dáýren Qosanovtyń tapsyrmasy boıynsha mundaı qaıǵyly oqıǵalardyń aldyn alýǵa baǵyttalǵan shuǵyl sharalar kesheni qabyldandy, - delingen habarlamada.
Birinshi. Tárbıe jumysynyń uıymdastyrylýy men áskerı tártipti baqylaý kúsheıtildi. Qarý-jaraqty paıdalaný, sabaqtar ótkizý, atys jattyǵýlary men tapsyrmalardy oryndaý kezinde jarǵylyq talaptar men qaýipsizdik sharalaryn saqtaý talaptary qatańdatyldy.
Ekinshi. Áskerı bólimderge Qarýly Kúshterdiń jeke quramyn keshendi psıhologııalyq tekserýden ótkizý úshin komıssııalar jiberildi. Áskerı qyzmetshilerdiń psıhıkalyq jaı-kúıine, sondaı-aq qyzmettik mindetterdi oryndaýǵa psıhologııalyq daıyndyq deńgeıine qaıta baǵalaý júrgizilýde.
Úshinshi. Komandırler men serjanttyq quramnyń jeke jaýapkershiligi arttyryldy. Negizgi nazar oqys oqıǵalardyń aldyn alýǵa jáne qaýipsiz minez-qulyq daǵdylaryn qalyptastyrýǵa baǵyttaldy.
Tórtinshi. Áskerı polıtsııa kúshterimen áskerı bólimderde jan-jaqty tekserýler uıymdastyryldy. Jeke quramǵa baqylaý, beınebaqylaý, onyń ishinde qyzmetten tys ýaqytta da, kúsheıtildi.
Besinshi. Táýlik boıy baqylaý engizilip, quqyq buzýshylyqtar men oqıǵalardyń aldyn alýǵa baǵyttalǵan qosymsha profılaktıkalyq sharalar qabyldandy.
Altynshy. Áskerı qyzmetshilerdiń týystarymen turaqty beınebaılanysy qamtamasyz etildi. Sonymen qatar bólimshe komandırleri ata-analarmen resmı baılanys arnalary arqyly turaqty túrde baılanysta.
- Oryn alǵan barlyq oqıǵalar boıynsha naqty kadrlyq jáne tártiptik sheshimder qabyldandy. «Shyǵys» óńirlik qolbasshylyǵynyń qolbasshysy, shtab bastyǵy jáne qolbasshynyń tárbıe jáne ıdeologııalyq jumys jónindegi orynbasary tártiptik jaýapkershilikke tartyldy. Áskerı qyzmetshi qaza tapqan áskerı bólimniń komandıri, onyń orynbasary, sondaı-aq batalon komandıri atqaryp otyrǵan laýazymdarynan bosatyldy.
Qabyldanyp jatqan barlyq sharalar eń aldymen jeke quramnyń ómiri men densaýlyǵyn saqtaýǵa jáne mundaı qaıǵyly jaǵdaılardyń qaıtalanýyna jol bermeýge baǵyttalǵan. Bul baǵyttaǵy jumys turaqty negizde jalǵasyn tabady, - dep jazdy Qorǵanys mınıstrliginen.
Aıta keteıik, keshe ǵana Jambyl oblysynda merzimdi áskerı qyzmettegi sarbaz qaza boldy.