Óskemendegi sarbaz ólimi: áskerı bólim komandıri men eki orynbasary qyzmetinen ketti
ASTANA. KAZINFORM – Sarbaz Q. Ospanovtyń qaza bolýyna qatysty áskerı bólimniń laýazymdy tulǵalaryna qarsy qozǵalǵan qylmystyq is tergelip, sotqa joldandy.
Bas áskerı prokýratýranyń málimetinshe, oqıǵa Óskemen garnızonyndaǵy áskerı bólimderdiń birinde bolǵan. Tergeý barysynda batalon jáne vzvod komandırleriniń jarǵydan tys qarym-qatynasqa jol bergeni, sondaı-aq qaza tapqan sarbaz ben onyń qyzmettesterine psıhologııalyq qysym kórsetkeni anyqtalǵan.
– Tergeý barysynda laýazymdy tulǵalardyń birneshe ret jarǵydan tys qarym-qatynasqa jol bergeni, áskerı qyzmetshilerge psıhologııalyq qysym kórsetkeni dáleldendi. Sonymen qatar vzvod komandıri qarý-jaraqty saqtaý tártibine tıisti baqylaý júrgizbeı, qyzmettik mindetterin oryndaýdan shet qalǵan. Jınalǵan dáleldemeler negizinde bılikti asyra paıdalaný jáne qyzmetke salǵyrt qaraý faktileri boıynsha qylmystyq is sotqa joldandy, – delingen Bas áskerı prokýratýra habarlamasynda.
Qabyldanǵan sharalar aıasynda áskerı bólim komandıri men onyń eki orynbasary qyzmetinen bosatylyp, taǵy 9 laýazymdy tulǵa tártiptik jaýapkershilikke tartylǵan.
Vedomstvo málimetinshe, tergeý barysynda qajetti saraptamalar jedel júrgizilip, qylmysqa qatysy bar barlyq tulǵalar anyqtalǵan. Sonymen qatar áskerı qyzmetshilerdiń qaza bolý derekterin tergeý tásilderi jetildirilip, tıisti organdar arasynda saraptamalardy jedel júrgizýge baǵyttalǵan memorandýmǵa qol qoıylǵan.
Aıta keteıik, bıylǵy 25 qańtarda Óskemendegi sarbaz óliminen soń Qorǵanys mınıstrligi resmı málimdeme jasady.
- Jyl basynan beri Qarýly Kúshterde áskerı qyzmetshilerdiń qaza tabýyna baılanysty QR Qorǵanys mınıstrliginiń basshylyǵy qaza bolǵandardyń otbasylaryna, týǵan-týystaryna jáne jaqyndaryna shynaıy kóńil aıtady.
Qarýly kúshterdiń basshylyǵy bolǵan jaǵdaıdyń barynsha aýyr ekenin jáne áskerı qyzmet qaýipsizdigin qamtamasyz etý úshin jaýapkershiliktiń tolyq kólemin tereń túsinedi. Qorǵanys mınıstri avıatsııa general-leıtenanty Dáýren Qosanovtyń tapsyrmasy boıynsha mundaı qaıǵyly oqıǵalardyń aldyn alýǵa baǵyttalǵan shuǵyl sharalar kesheni qabyldandy, - delingen habarlamada.
