Óskemendegi ortalyq sýburqaq ýáde etilgendeı mamyrda emes jazdyń sońynda qosylmaq
ÓSKEMEN. KAZINFORM – Óskemendegi Respýblıka alańynda ornalasqan qalanyń basty sýburqaǵy bıyl ádettegideı mamyr aıynda emes, tek tamyz aıynda iske qosylmaq. Jazdyń aptap ystyǵynyń eki aıy ótkennen keıin ǵana ony kútip-ustaýmen aınalysatyn merdiger mekeme anyqtaldy.
Qalalyq turǵyn úı-kommýnaldyq sharýashylyq bóliminiń málimetinshe, mamandar daıyndyq jumystaryn bastap ketken.
– Merdiger uıym anyqtaldy. Qazirgi ýaqytta sýburqaqqa tehnıkalyq qyzmet kórsetý, jabdyqtardy tazalaý jáne oǵan irgeles aýmaqty abattandyrý jumystary júrgizilip jatyr. Bul jumystar aıaqtalǵan soń sýburqaq elektr jelisine qosylady, – delingen aqparatta.
Ádette Óskemende sýburqaqtar maýsymy mamyr aıynda ashylady. Alaıda bıyl jaz boıy kúnniń ystyq bolǵanyna qaramastan, sýburqaqtar iske qosylǵan joq. Bul jaǵdaı áleýmettik jelide qyzý talqylanyp, turǵyndardyń da narazylyǵyn týdyrǵan bolatyn.
TÚKSh bólimi mamandarynyń túsindirýinshe, keshigýge qalalyq sýburqaqtarǵa qyzmet kórsetetin merdiger uıymnyń ýaqytyly anyqtalmaýy sebep boldy.
Búginde oblys ákimdigi ǵımaratynyń aldyndaǵy Respýblıka alańynda ornalasqan ortalyq sýburqaq qana iske qosýǵa daıyndalyp jatyr. Al qaladaǵy ózge sýburqaqtardyń qashan jumysyn bastaıtyny ázirge naqtylanbady.
Eske salsaq, osyǵan deıin Aqtóbede sýburqaqtardy jóndeý jumysy uzaqqa sozylyp ketkeni habarlanǵan.
