Óskemendegi óndiristik angar órtendi, zardap shekkender bar

ASTANA. KAZINFORM – QR Tótenshe jaǵdaılar mınıstrligi qutqarýshylary Óskemen qalasyndaǵy óndiristik angarda shyqqan órtti sóndirdi.

Vedomstvo málimetinshe, órt Avrora kóshesinde ornalasqan JShS aýmaǵyndaǵy jeke turǵan angar ǵımaratynda bolǵan. Alǵashqy órt sóndirý bólimsheleri jetken kezde jalyn ǵımarat ishindegi arnaıy tehnıkany sharpyǵan.

Nysan qyzmetkerleri qutqarýshylar kelgenge deıin ózdiginen evakýatsııalanǵan.

Órtti sóndirý jumystary jarylys qaýpiniń joǵary bolýyna baılanysty kúrdelene tústi. Kúshti jylý áseri aımaǵynda gaz jáne ottegi ballondary bolǵan. Qutqarýshylar olardy der kezinde qaýipsiz jerge shyǵardy.

Órt 170 sharshy metr aýmaqta sóndirildi. 1964 jáne 1972 jyly týǵan seriktestiktiń eki qyzmetkerine TJM Apattar medıtsınasy ortalyǵynyń dárigerleri oqıǵa ornynda alǵashqy medıtsınalyq kómek kórsetip, keıin olardy aýrýhanaǵa jetkizdi.

Aıta keteıik, Aqmola oblysyndaǵy órtten zardap shekkenderge medıtsınalyq jabdyq jetkizildi.