Óskemendegi mektep býhgalterleri 144 mln teńgeden astam aqsha jymqyrǵan

ASTANA.KAZINFORM - Óskemende Jambyl atyndaǵy mamandandyrylǵan mektep-gımnazııasynyń qyzmetkerlerine qatysty sot úkimi shyqty.

Óskemen qalasyndaǵy № 2 sottyń baspasóz qyzmetiniń málimetinshe, esepshiler jeti jyl boıy bıýdjet qarajatyn zańsyz jymqyrǵan.

— 2017-2024 jyldar aralyǵynda bas esepshi men onyń áriptesi sóz baılasyp áreket etken. Olar ózderiniń qyzmettik babyn paıdalanyp, shottaryna júıeli túrde aqsha aýdaryp, memleketke zııan keltirgen, — dep túsindirdi baspasóz qyzmeti.

Sot anyqtaǵandaı, jalpy shyǵyn 144 622 868 teńgeni quraǵan. Aqsha bilim berý júıesine tıesili jáne mektep qajetine jumsalýy tıis edi.

Sot otyrysynda eki áıel de óz kinásin moıyndap, ókindi. Bul úkim shyǵarý kezinde eskerildi.

— Sot olardy jeti jylǵa bas bostandyǵynan aıyrdy. Sonymen qatar, eki sottalýshy da keltirilgen zııandy tolyq óteýi qajet, — dep túsindirdi sottyń baspasóz qyzmeti.

Sondaı-aq sottalǵandarǵa materıaldyq jaýapkershilikke baılanysty laýazymdardy atqarýǵa ómir boıyna tyıym salyndy.

Sot úkimi áli zańdy kúshine engen joq.

Buǵan deıin Shymkentte qurylys basqarmasy bastyǵynyń burynǵy orynbasarynyń sottalǵany habarlanǵan bolatyn.