Óskemendegi «Kógildir kólder» jaǵajaıy jaz maýsymyna deıin ashylmaýy múmkin
ÓSKEMEN. KAZINFORM — Óskemen qalasyndaǵy eń tanymal demalys oryndarynyń biri — Sol jaǵalaý saıabaǵynda ornalasqan «Kógildir kólder» jaǵajaıy ázirge jabyq tur.
Shomylý maýsymy bastalar aldynda sý sapasy men demalys aımaǵynyń sanıtarlyq jaǵdaıy tekserilip jatyr. ShQO Týrızm basqarmasynyń basshysy Erjan Sembınov oblys ákimdiginde ótken jıynda jaǵajaıdy ashý týraly túpkilikti sheshim mamyr aıynyń sońyna deıin qosymsha saraptama qorytyndysynan keıin qabyldanatynyn aıtty.
— Ótken jyldan beri «Kógildir kólder» jaǵajaıy sanıtarlyq-epıdemıologııalyq kórsetkishterge baılanysty jabyq tur. Qazir sý sapasyna qosymsha zertteý júrgizilýde. Sonyń nátıjesine qaraı jaǵajaıdy osy maýsymda paıdalanýǵa berý múmkindigi týraly sheshim qabyldanady, — dedi ol.
Qazir Óskemende resmı túrde jumys istep turǵan eki jaǵajaı bar. Olar Ertis jaǵasyndaǵy «Samal» saıabaǵyndaǵy jaǵajaı men «Kotlovan» demalys orny.
— «Samal» jaǵajaıyn aýqymdy jańǵyrtý josparlanyp otyr. Saıabaqty rekonstrýktsııalaý aıasynda aýmaqty abattandyrýǵa shamamen 500 mln teńge bólinedi. Joba aıasynda ózen aǵysyn báseńdetý jumystary qarastyrylǵan. Bul demalýshylardyń qaýipsizdigin qamtamasyz etý úshin qajet, — deıdi basqarma basshysy.
Eske salsaq, osyǵan deıin Qyzylorda oblysynda shomylýǵa ruqsat etilgen oryndar belgili bolǵany habarlanǵan.
