Óskemendegi kásiporyndarǵa qolaısyz meteojaǵdaıda jumys isteýge tyıym salyna ma

ASTANA. KAZINFORM – Óskemendegi jer úılerdiń bir bóligi ortalyqtandyrylǵan jylý jelisine jalǵanady. Bul týraly Shyǵys Qazaqstan oblysynyń ákimi Ermek Kósherbaev Úkimet otyrysynda aıtty.

- Úlbi metallýrıgııalyq zaýytymen, «Qaztsınkpen», Óskemen jáne Sogra jylý-elektr ortalyqtarymen qolaısyz meterologııalyq jaǵdaı týyndaǵan jaǵdaıda ózara úndesip áreket etý týraly memorandým bekittik. Ekologııa departament tabıǵat paıdalanýdy retteý basqarmasymen birge, qoǵam ókilderiniń qatysýymen oblystyq máslıhatqa qolaısyz meteojaǵdaı qalyptasqan jaǵdaıda birqatar kásiporynnyń jumysyna tyıym salý týraly usynys engizgen bolatyn. Máslıhat osy máseleni qaraıdy, - dedi oblys ákimi.

Ermek Kósherbaev qalanyń aýasyn kólik pen jer úıler de qatty lastap jatqanyn aıtty. Ákimdik ásirese túrli sapadaǵy kómir jaǵatyn úılerdiń murjasynan shyǵatyn tútinge alańdap otyrǵan kórinedi.

- Osy máseleni sheshý úshin qaladaǵy jer úılerdiń bir bóligin ortalyqtandyrylǵan jylý jelisine jalǵaýdy josparlap otyrmyz. Aldaǵy úsh jylda osy baǵytta jumys isteımiz, - dedi ákim.

Eske salsaq, Óskemen qalasynda turǵyn aýdandarda kóligin 5 mınýttan artyq qyzdyrǵan 3 adamǵa aıyppul salynǵan bolatyn.