Óskemendegi yqshamaýdan halqy mektep salynýyn saryla kútip júr
ÓSKEMEN.KAZINFORM — Óskemendegi Armatýrnyı yqshamaýdanynyń turǵyndary balalaryn qalanyń basqa shetindegi mektepterge tasýǵa májbúr bolyp júrgendikterin aıtty. Sondyqtan olar óz aýdanynda bilim ordasynyń boı kótergenin qalaıdy.
Halyq sany kóbeıip keledi
Búginde Armatýrnyı yqsham aýdanynda mektep jasyndaǵy 268 bala bar. Olar qalanyń ár túkpirine baryp oqıdy. Sondyqtan ata-analar yqsham aýdannyń ózinde mektep salynǵanyn saryla kútip júr.
— Tym quryǵanda sport zaly bar bastaýysh synyp boı kóterse deımiz. Áıtpese tańmen talasa turyp, qalanyń basqa buryshyndaǵy mektepke baryp, keıin ony alyp ketý úshin qaıta jol júrý — ońaı sharýa emes. Bir jaǵynan yqsham aýdan halqy birtindep kóbeıip te keledi. Jas otbasylar da bar, — deıdi turǵyndar.
Qalalyq bilim bóliminiń basshysy Dýmanǵazy Arynǵazın mundaı qıyndyqtar baryn jasyrmady.
— Biz bul máseleden habardarmyz. Jalpy, mektep salynýyn bári kútip júr. Endigi suraq sol, qansha orynǵa arnalǵan mektep bolýy tıis? Aqsaqaldar bastaýysh mektep salynsa jetedi deıdi. Jalpy mundaǵy týý kórsetkishi de qýantyp otyr. Ásirese, 2019 jyldan beri kúrt ósti. Osyny eskersek, bul jaqqa 300 oryndyq mektep kerek, — dedi bilim bóliminiń basshysy Dýmanǵazy Arynǵazın.
Qala ákimi ne deıdi?
Óskemen qalasynyń ákimi Almat Aqyshovtyń aıtýynsha, bári jobalaý men qarjylandyrýǵa kelip tireledi.
— «Keleshek mektepteri» jobasy aıasynda Babkına melnıtsa aýdanyndaǵy 300 oryndyq mektep qurylysyna 5 mlrd teńgedeı jumsalǵan bolatyn. Bul qomaqty soma, alaıda biz jumys isteýge daıynbyz. Shaǵyn aýdandarǵa jaraıtyn tıptik mektepter de bar. Biraq ol 100-150 orynǵa shaqtalǵan. Esesine, shyǵyny az: 500 mln teńgeden 1 mlrd-qa deıin. Osy jaǵyn oılastyryp, naqty sheshim qabyldaımyz, — dedi ákim.
Eske salsaq, osyǵan deıin Respýblıka kúni qarsańynda elimizdiń 8 óńirinde mektep ashylǵany habarlanǵan.
