Óskemendegi hokkeıshi ólimi: kassatsııalyq sot úkimdi ózgerissiz qaldyrdy
ÓSKEMEN. KAZINFORM - Qylmystyq ister jónindegi kassatsııalyq sot Óskemenniń «Torpedo» hokkeı klýbynyń 19 jastaǵy oıynshysy Ivan Pylenoktyń qazasyna qatysty is boıynsha túpkilikti sheshim shyǵardy.
Joǵarǵy sot satysy apellıatsııalyq sottyń úkimin ózgerissiz qaldyryp, qorǵaý tarapynyń da, jábirlenýshilerdiń de kassatsııalyq shaǵymdaryn qanaǵattandyrmady.
Qaıǵyly oqıǵa 2025 jylǵy 2 tamyzda Óskemendegi Borıs Aleksandrov atyndaǵy sport saraıynda bolǵan. Sportshy men Andreı Lagýnov arasyndaǵy janjal turmystyq sıpattaǵy múliktik daýdan týyndaǵan. Lagýnov quny 7 900 teńge bolatyn jeldetkishti qaıtarýdy nemese onyń qunyn óteýdi talap etken. Janjal kezinde ol hokkeıshiniń moınynan birneshe ret qylqyndyra ustaǵan. Qysym álsiregennen keıin Ivan Pylenok esinen tanyp, jerge qulaǵan.
Áýeli Andreı Lagýnov sot sheshimimen kináli dep tanylyp, 1 jyl 6 aıǵa bas bostandyǵynan aıyrylǵan bolatyn. Keıin QR Konstıtýtsııasynyń 30 jyldyǵyna oraı qabyldanǵan «Amnıstııa týraly» zańǵa sáıkes jazasyn óteýden bosatyldy.
Alaıda apellıatsııalyq sot jazany qatańdatyp, ony 3 jyl 9 aıǵa bas bostandyǵynan aıyrdy. Keıin amnıstııa týraly zańnyń qoldanylýyna baılanysty jaza merzimi 3 jylǵa deıin qysqartyldy. Sonymen qatar sot azamattan qaza bolǵan hokkeıshiniń ata-anasynyń árqaısysynyń paıdasyna 10 mln teńgeden moraldyq ótemaqy jáne 1 mln teńgeden sot shyǵyndaryn óndirý týraly sheshim shyǵardy.
Kassatsııalyq shaǵymda qorǵaý tarapy sottalǵan azamatty tolyq aqtaýdy surady. Advokattar Lagýnov jábirlenýshiniń ólimin aldyn ala boljaı almaǵanyn, al ólimge ákelgen jaraqattar qulaǵan kezde bolýy múmkin ekenin alǵa tartty. Al jábirlenýshi taraptyń ókilderi kerisinshe jaza merzimin 7 jylǵa deıin ulǵaıtýdy talap etti.
Alaıda sot eki taraptyń da ýájderimen kelispedi.
– Sottalǵan azamattyń kinási kýálardyń aıǵaqtary, beınebaqylaý kameralarynyń jazbalary jáne sot-medıtsınalyq saraptamalardyń qorytyndylary sııaqty zerttelgen dáleldemelerdiń jıyntyǵymen tolyq dáleldendi. Sarapshylardyń qorytyndysyna sáıkes, ólimge moıynnyń refleksogendik aımaǵyndaǵy jabyq doǵal jaraqat saldarynan júrektiń reflektorlyq toqtaýy sebep bolǵan. Mundaı jaraqat adamnyń óz boıynyń bıiktiginen qulaǵan kezde bolýy múmkin emes, – delingen kassatsııalyq sot qaýlysynda.
Osylaısha, kassatsııalyq sot apellıatsııalyq sottyń úkimin ózgerissiz qaldyrdy. Sottalǵan azamatty aqtaýdy talap etken qorǵaý tarapynyń da, jazany qatańdatýdy suraǵan jábirlenýshiler ókilderiniń de shaǵymdary qanaǵattandyrylǵan joq.
Eske salsaq, osyǵan deıin Oralda test nátıjelerin burmalaý arqyly zańsyz tabys tapqandar sottalǵany habarlanǵan.
