Óskemendegi Gematologııa ortalyǵy qurylysyna 33,6 mlrd teńge bólindi
ASTANA. KAZINFORM – Úkimet Memleket basshysy Ulttyq quryltaıdyń tórtinshi otyrysy barysynda alǵa qoıǵan Óskemendegi Gematologııa ortalyǵyn jedeldetip paıdalanýǵa berý týraly tapsyrmasyn júzege asyrý aıasynda Arnaýly memlekettik qordan 33,6 mlrd teńge bóldi. Bul týraly Úkimettiń baspasóz qyzmeti habarlady.
Medıtsına mekemesinde eki korpýs: 148 oryndyq statsıonar jáne klınıka naýqastaryna arnalǵan 24 oryndyq qonaq úı qarastyrylǵan. Bas ǵımaratta zamanaýı medıtsınalyq qural-jabdyqtarmen qamtylǵan zerthanalar, sáýlelik dıagnostıka, kardıologııa, kardıohırýrgııa, gematologııa, súıek kemigin transplantatsııalaý jáne kúrdeli somatıka bólimsheleri ornalastyrylady. Jańa ortalyq naýqastar emdeý men ońaltýdyń ozyq ádisterine qol jetkizýge múmkindik beredi.
Jobanyń jalpy quny – 71,3 mlrd teńge. Búginde nysannyń 78%-y aıaqtalǵan. Ǵımarattyń qańqasy turǵyzylyp, syrtqy ınjenerlik jeliler tartylǵan, shatyr, qasbeti, tereze bloktary daıyndalyp, ishki árleý jumystary ishinara aıaqtalǵan.
Úkimet densaýlyq saqtaý júıesindegi ınfraqurylymdy damytýǵa erekshe kóńil bólip keledi. 2024 jyldyń qorytyndysy boıynsha «Aýylda densaýlyq saqtaýdy jańǵyrtý» ulttyq jobasy aıasynda 361 alǵashqy medıtsınalyq-sanıtarııalyq kómek kórsetý nysanynyń qurylysy aıaqtaldy. Bul óz kezeginde shalǵaı jáne aýyldyq eldi mekender turǵyndaryna medıtsınalyq qyzmet kórsetýdiń qoljetimdiligin arttyrýǵa múmkindik berdi. Búginde Úkimet áleýmettik mańyzy bar nysandar qurylysyna Arnaýly memlekettik qordan qarajat bóldi. Olardyń qatarynda 7 mektep, onyń ishinde bir mýzyka mektebi, 2 sport kesheni, stadıon, kópsalaly aýrýhana kesheni, oblystyq jedel járdem stansasy, Arnaýly áleýmettik qyzmetter kórsetý ortalyǵy, jataqhana, 2 balabaqsha bar. Budan bólek, qarajat Qyzylorda oblysynyń Aral aýdanyndaǵy sýmen jabdyqtaý júıelerin salý jáne jańǵyrtýǵa baǵyttaldy.
Jumys jalǵasyp jatyr.
- Ortalyqta kúndizgi jáne táýlik boıy jumys isteıtin statsıonar, somatıka bólimshesi, kardıologııa, kardıohırýrgııa, súıek kemigin transplantatsııalaý, hımıoterapııa bólimshesi qarastyrylǵan. Biz ýltra júıelik jabdyqty ornatamyz. 2025 jyly eki angıografııalyq júıe iske qosylady. Munda joǵary tehnologııalyq medıtsınalyq operatsııalardy jasaı alamyz. Bul bizdiń patsıentterimizge jáne bizdiń mamandarǵa kóbirek múmkindikter beredi. Bul jabdyq TMKKK-ǵa kiredi, - dep atap ótti ShQO densaýlyq saqtaý basqarmasy basshysynyń orynbasary Mádına Myrzabekova.
Aıta keteıik, Óskemende jumys ýaqyty 1 saǵatqa shegerildi.