Óskemendegi Ertis kópirin jóndeý jumystary taǵy da keıinge shegerildi
ÓSKEMEN. KAZINFORM – Óskemen qalasyndaǵy Ertis kópirin jóndeý jumystarynyń naqty qashan bastalatyny ázirge belgisiz. Buǵan deıin jóndeý maýsym aıynda qolǵa alynady dep josparlanǵanymen, aı sońyna deıin qurylys bastalmady.
Ertis kópiri – qala boıynsha kólik eń kóp júretin ótkelderdiń biri. Kólik qozǵalysynyń jıiligine baılanysty mundaǵy jol jabyny tez tozady. Kommýnaldyq qyzmetter joldaǵy shuńqyrlardy jamap otyrǵanymen, kóp uzamaı jol jaǵdaıy qaıta syn kótermeı ketedi.
Buǵan deıin qala ákimdigi bıyl kópirde jóndeý jumystaryn júrgizý josparlanyp otyrǵanyn jáne nysanǵa tehnıkalyq tekserý jasalǵanyn málimdegen edi. Alaıda jobany iske asyrý merzimi ázirge naqtylanbaǵan.
– Ertis kópirin jóndeý jumystary bıyl júrgiziledi. Alaıda onyń naqty qashan bastalatyny ázirge anyqtalǵan joq, – dep habarlady Óskemen qalasy ákimdiginiń baspasóz qyzmetinen.
Júrgizýshilerdiń aıtýynsha, shuńqyrlardy jamaý arqyly júrgiziletin aǵymdaǵy jóndeý jumystary máseleni túbegeıli sheshpeıdi. Qarqyndy kólik aǵyny jóndelgen ýchaskelerdi qysqa ýaqyt ishinde qaıta búldiredi.
Sonymen qatar kópirdiń asty da abattandyrýdy qajet etedi. Buǵan deıin bul aýmaqta avtokólikterdiń júrýine múmkindik jasalǵanymen, jaıaý júrginshilerge arnalǵan aýmaqty abattandyrý jumystary tolyq aıaqtalmaǵan.
Osylaısha, Ertis arqyly ótetin qalanyń basty kópirleriniń birin kúrdeli jóndeýden ótkizý merzimi taǵy da keıinge qalyp otyr. Jóndeý jumystarynyń naqty qashan bastalatyny ázirge belgisiz.
Eske salsaq, osyǵan deıin Óskemende sapasyna halyq jıi shaǵymdanatyn Ertis kópirinde jóndeý jumystary bastalatyny jaıly jazǵanbyz.
