Óskemendegi Ertis kópiri kúrdeli jóndeý aldynda keshendi tekserýden ótedi

ÓSKEMEN. KAZINFORM – Óskemen qalasyndaǵy Ertis kópirinde keshendi tehnıkalyq tekserý jumystary bastaldy.

Tehnıkalyq dıagnostıka kópirdiń naqty jaı-kúıin anyqtap, aldaǵy kúrdeli jóndeý jumystaryn josparlaýǵa negiz bolmaq.

Daıyndyq kezeńinde mamandar jobalaýshylarmen birlesip kópirdiń irgetasyn qarap shyqty. Aldaǵy ýaqytta tirekter men kótergish qurylymdardan bastap jol jabynyna deıin barlyq element jan-jaqty tekseriledi. Bul atqarylatyn jumystardyń naqty kólemin, kezeńderin jáne tehnıkalyq sheshimderin aıqyndaýǵa múmkindik beredi.

Qala ákimi Almat Aqyshovtyń aıtýynsha, keshendi tásil jóndeý jumystarynyń júıeli júrgizilýi men kópirdiń qaýipsiz ári uzaq merzimdi paıdalanylýyn qamtamasyz etý úshin qajet.

– Tekserý kópirdiń tehnıkalyq jaǵdaıy týraly tolyq málimet berip, konstrýktsııanyń tozýy men naqty júktemelerdi eskere otyryp, jóndeý jumystaryn dál josparlaýǵa múmkindik syılaıdy, - dedi ol.

Aıta keteıik, osy Ertis kópirinde únemi tańerteń jáne keshke uzyn-sonar kólik keptilisi bolady. Sebebi halyq kóp turatyn Jibek matalar kombınaty yqshamaýdanyna aparar negizgi jol osy.

Eske salsaq, osyǵan deıin Óskemende Ertis kópiri astyndaǵy jańa jol turǵyndar arasynda daý týdyrǵany habarlanǵan.