Óskemendegi ekologııa máselesi: Arnaıy bıýro qurylyp, baqylaý kúsheıtilmek

ÓSKEMEN. KAZINFORM – Óskemen qalasyndaǵy ekologııa máselesin sheshý úshin arnaıy bıýro qurylyp, baqylaýdy kúsheıtý kózdelip otyr.

Bul týraly búgin QR Prezıdenti janyndaǵy Ortalyq kommýnıkatsııalar qyzmetiniń kóshpeli baspasóz konferentsııasynda Shyǵys Qazaqstan oblysynyń ákimi Ermek Kósherbaev málim etti.

— Ózimiz de osy qalada turamyz. Sondyqtan ekologııa máselesin kórip-bilip júrmiz. Biraq buǵan tek óndiristik kásiporyndar emes, kómir jaǵatyn peshter men kólikter de áserin tıgizýde. Aýadaǵy zııandy shyǵaryndylar aralasyp basqa gazǵa aınalady. Kásiporyndary az Almaty men Qyrǵyzstannyń Bishkek qalasynda da jel soqpasa shahar ishin tútin basady, — deıdi Ermek Kósherbaev.

Onyń aıtýynsha, zııandy shyǵaryndylardy ruqsat etilgen shekten asyryp jibergen kásiporyndarǵa jylda 3,5 mlrd teńge mólsherinde aıyppul salynady. Bul soma ekologııalyq jaǵdaıdy jaqsartý, monıtorıngti kúsheıtýge jumsalmaq. Sondaı-aq «Halyq bankimen» demeýshilik boıynsha kelisim jasalǵan.

— Bir apta buryn ekolog mamandar jáne qoǵam ókilderimen birge Qoǵamdyq keńes janynan turaqty jumys isteıtin «Óskemen tynysy» ekologııalyq qorǵaý bıýrosyn» qurý týraly usynysty talqyladyq. Qoǵam, bılik pen ónerkásip ókilderi dıalog arqyly aýa sapasyna qatysty qordalanǵan máselelerdiń sheshimin tabý kerek. Bıýro osy baǵytta usynystar ázirlep, turǵyndarǵa aýa lastanýynyń qaýip-qateri men ony azaıtýdyń joldaryn túsindiredi. Eń bastysy, qoǵamdyq baqylaý kúsheıtiledi, — deıdi ShQO ákimi.