Óskemendegi balalar úıirmeleriniń jabylyp qalý qaýpi bar ma

ÓSKEMEN. KAZINFORM – Óskemende ata-analar mektepterdegi tegin shyǵarmashylyq úıirmelerdiń jabylyp qalýyna alańdap otyr.

Áleýmettik jelide qaladaǵy keıbir jalpy bilim beretin mektepterde osy ýaqytqa deıin jumys istep kelgen úıirmelerdiń jabylaıyn dep jatqany týraly aqparat tarady. Bul úıirmelerde júzdegen bala vokal, bı, aspaptarda oınaý jáne basqa da shyǵarmashylyq baǵyttar boıynsha esh aqysyz oqyp kelgen.

Mundaı úıirmeler №15, №24 jáne №33 mektepterde boldy. Qazirgi ýaqytta №15 jáne №24 mektepterdegi úıirmelerdi basqa ǵımaratqa kóshirý josparlanyp otyr eken.

- Qyzym №15 mekteptegi úıirmelerge qatysyp júrgenine eki jyl boldy. Úıge jaqyn, tegin ári muǵalimderi de bilikti. Endi bizdi qalanyń arǵy shetine jiberip jatyr. Bul óte yńǵaısyz, - deıdi qala turǵyny Anna Mamaeva.

Keıbir ata-analar úshin úıirmeniń basqa jerge kóshýi qoljetimdilik jaǵynan qıyndyq týdyrady.

- Bul osy mańdaǵy balalardyń shyǵarmashylyqpen aınalysatyn jalǵyz orny edi. Endi ony jóndeımiz degen syltaýmen basqa jaqqa aýystyryp jatyr, - deıdi taǵy bir ata-ana.

Alaıda qalalyq bilim bóliminiń málimetinshe, úıirmeler jabylmaıdy jáne toqtatylmaıdy, tek ınklıýzııany qoldaý kabınetterin (IKK) keńeıtýge baılanysty mektep ishindegi bólmeler qaıta bólinbek.

- Normatıv boıynsha osyndaı synyptarda 10-nan artyq bala oqı almaıdy. Olardyń árqaısysyna jeke tıýtor qajet. Sondyqtan arnaıy beıimdelgen bólmeler kerek. Óner úıirmeleri osy ýaqytqa deıin mektep ishindegi kabınetterde ótkizilse, endi bul bólmeler oqý protsesi úshin qajet bolyp otyr, - dep túsindirdi bólim basshysy Dına Sháripova.

Onyń aıtýynsha, barlyq úıirme muǵalimderi men toptar Protozanov kóshesi, 37 mekenjaıyndaǵy kúrdeli jóndeýden ótken «Juldyz» balalar óner mektebi ǵımaratyna kóshiriledi. Munda sabaqtar burynǵydaı bıýdjet esebinen qarjylandyrylady. Jańa ǵımaratta dombyra, vokal, horeografııa, teatr, qoldanbaly jáne beıneleý óneri baǵyttaryndaǵy úıirmeler saqtalady.

- Biz barlyq úıirmeni saqtap qalamyz. Kerisinshe úıirmeler túrin keńeıtemiz ári qoljetimdilikti qamtamasyz etemiz. Sonymen qatar oqýshylarǵa qoǵamdyq kólikte tegin júrý múmkindigi de qarastyrylyp jatyr, - dep habarlady Óskemen qalasy ákimdiginen.

Eske salsaq, osyǵan deıin endi mektepterdegi qarjylyq tólemderge onlaın-monıtorıng júrgiziletindigi habarlanǵan.