Óskemendegi «Azııa Avto» zaýytynyń aýmaǵy memleket menshigine beriledi
ÓSKEMEN. KAZINFORM – Óskemen qalasyndaǵy qurylysy aıaqtalmaǵan «Azııa Avto» zaýytynyń aýmaǵy memleket menshigine bekitiledi.
Bul uzaq ýaqyt boıy paıdalanylmaǵan jáne iske qosylmaǵan nysan. Zańǵa sáıkes, tıisti konkýrstyq rásimder aıaqtalǵannan keıin jáne komıssııanyń oń sheshimi bolǵan jaǵdaıda, 15 jumys kúni ishinde memlekettik múlik jáne jekeshelendirý departamenti oblys ákimdigimen kelisý arqyly múliktik keshendi memlekettik organdardyń birine berý týraly sheshim qabyldaıdy.
- Azııa Avto» zaýytynyń aýmaǵyn memleket menshigine bekitý ony júıeli damytýǵa, ıaǵnı ınfraqurylymdy jańǵyrtýdan bastap jańa óndiristerdi iske qosý men ınvestıtsııa tartýǵa múmkindik beredi. Sonymen qatar bul jerde arnaıy ekonomıkalyq aımaq qurý máselesi qarastyrylyp otyr. Otandyq jáne sheteldik ınvestorlardy tarta otyryp, jańa óndiristerdi ornalastyrý josparlanǵan, - dep habarlady oblys ákimdiginen.
Josparlardy iske asyrý úshin nysannyń tehnıkalyq jaǵdaıyna keshendi taldaý júrgizý, ınfraqurylymdy qalpyna keltirý jáne jańǵyrtýǵa qajetti jumystardyń kólemi men qunyn baǵalaý qajet.
Eske salsaq, osyǵan deıin «Azııa Avto» kompanııasynyń burynǵy basshysy syrttaı 9 jylǵa bas bostandyǵynan aıyrylǵany habarlanǵan.
