Óskemendegi áskerı bólimderdiń birinde merzimdi qyzmettegi sarbaz kóz jumdy
ÓSKEMEN. KAZINFORM – Óskemen garnızonynyń bir áskerı bóliminde merzimdi áskerı qyzmettegi sarbaz qaraýyldyq qyzmet atqarý kezinde óz qarýynan oq atqan. Ol alǵan jaraqattan kóz jumdy.
Qazaqstan Respýblıkasynyń Qurlyq áskerleri baspasóz qyzmetiniń málimetinshe, oqıǵa 23 qańtarda bolǵan.
– Óskemen garnızonynyń bir áskerı bóliminde qaraýyldyq qyzmet kezinde merzimdi áskerı qyzmettegi sarbaz bekitilgen qarýdan ózin-ózi atyp, alǵan jaraqatynan qaza tapty, - delingen resmı habarlamada.
Qaza tapqan sarbaz 2025 jylǵy sáýir aıynda merzimdi áskerı qyzmetke shaqyrylǵan. Oqıǵa boıynsha Shyǵys óńirlik áskerı-tergeý basqarmasy qylmystyq is qozǵady. Qazirgi ýaqytta sotqa deıingi tergeý Óskemen garnızonynyń Áskerı prokýratýrasynyń baqylaýymen júrgizilip jatyr. Tergeý múddesine baılanysty oqıǵanyń tolyq sebebi men mán-jaıy jarııalanbaǵan.
Qorǵanys mınıstriniń tapsyrmasymen oqıǵanyń obektıvti jáne jan-jaqty zerttelýin qamtamasyz etý maqsatynda arnaıy komıssııa qurylyp, oqıǵa ornyna jiberildi. Komıssııany Qazaqstan Respýblıkasynyń Qorǵanys mınıstriniń orynbasary, general-maıor Asqar Mustabekov basqarady.
Qorǵanys mınıstrligi men Qarýly Kúshter qaza tapqan sarbazdyń otbasy men jaqyndaryna kóńil aıtyp, olarǵa barlyq qajetti qoldaý kórsetiletinin málimdedi.
– Áskerı qyzmetshiniń otbasyna qoldanystaǵy zańnamaǵa sáıkes barlyq kómek kórsetiledi, - dep habarlandy vedomstvodan.
Eske salsaq, buǵan deıin Shymkent qalasynda merzimdi áskerı qyzmettegi sarbaz qaza taýyp, sol oqıǵa boıynsha qylmystyq is qozǵalǵan bolatyn.