Qazaqstan BUU-nyń FAO uıymymen birlesken baǵdarlamany iske asyrady
ASTANA. KAZINFORM – Joba sýdy tıimdi paıdalanýǵa jáne únemdeýge baǵyttalǵan. Bul jóninde QR Sý resýrstary jáne ırrıgatsııa vıtse-mınıstri Talǵat Momyshev Óńirlik ekologııalyq sammıttiń azyq-túlik qaýipsizdigi jónindegi taqyryptyq sessııasynda málimdedi.
– Elimiz BUU-nyń Azyq-túlik jáne aýyl sharýashylyǵy uıymymen (Food and Agriculture Organization) seriktestik baǵdarlamasyn quryp jatyr. Joba sý resýrstaryna arnalǵan jáne onyń 4 negizgi baǵyty bar. Olar – baısseındik josparlaý, sý sharýashylyǵy júıelerin paıdalanýda tıimdilikti arttyrý, ilki jobalardy júzege asyrý jáne sý únemdeıtin tehnologııalardy engizý, – dedi vıtse-mınıstr.
Sonymen qatar ol atalǵan salada qazirdiń ózinde atqarylyp jatqan sharýalarǵa toqtaldy.
– Búginde 42 jańa sý qoımasy salynyp jatyr. Al osyndaı 37 nysan jańartylýda. Budan bólek, 14,5 myń shaqyrym sý arnasy jóndelip jatyr. Sý resýrstaryn tıimdi paıdalaný maqsatynda sektordy tsıfrlandyrý jalǵasyp keledi. Onyń aıasynda jer asty sýlary tirkelip, saladaǵy obektilerge arnaıy tólqujat beriledi, – dedi ol.
Aıta keteıik, buǵan deıin óńirlik ekologııalyq sammıtte Kaspıı teńizi máselesi kóterilgenin jazǵanbyz.
