Óskemende jyl basynan beri 700-den astam adam kóktaıǵaqta qulap, jaraqat aldy

ÓSKEMEN. QazAqparat – Óskemen qalasynda qańtar aıynyń basynan beri kóktaıǵaq saldarynan 700-den astam adam zardap shekti, dep habarlaıdy QazAqparat tilshisi.

ShQO densaýlyq saqtaý basqarmasy baspasóz qyzmetiniń málimetine súıensek, osy aıdyń basynan beri Óskemende turǵyndar arasynda kóktaıǵaq saldarynan jaraqat alyp aýrýhanaǵa júgingender kóbeıdi. Naqty aıtqanda, búginge deıin 700-den astam adam zardap shekken.

«Onyń ishinde 310 adamnyń qoly nemese aıaǵy syndy. Jurtshylyqqa taıǵanap qulap, qandaı da bir jaraqat alǵan jaǵdaıda birden dárigerlerge qaralý kerektigin eskertemiz», - delingen aqparatta.

Oblystyq Tótenshe jaǵdaılar departamentiniń habarlaýynsha, qańtarda, ásirese aıdyń birinshi jartysynda Óskemen kóshelerinde kóktaıǵaq boldy. Buǵan aýa temperatýrasynyń jıi qubylýy sebep.