Óskemende júzbeli dámhananyń orny aýystyrylady
ÓSKEMEN. QazAqparat - Óskemen qalalyq tótenshe jaǵdaılardy eskertý jáne joıý jónindegi komıssııasynyń kezekten tys otyrysynda jaǵalaýda birneshe ret sýǵa aǵyp ketken júzbeli tuǵyrnamadaǵy «Arabella» debarkader-kafesin tómen qaraı 200 metr jerge aparý týraly sheshim qabyldandy. Bul týraly «QazAqparat» HAA tilshisi qalalyq TJ basqarmasyna silteme jasap habarlaıdy.
«Qazaqstan sý joldary» RMQK Joǵary Ertis bólimshesi erteń - 22 sáýirge deıin nysandy Ertisti tómen boılaı, Pogranıchnaıa jáne Toǵas kóshelereniń ortasynda ornalasqan avtomobıl kópirinen tómenge súıretip aparyp, aǵyp ketpeýi úshin arqandaýdy usyndy.
Sońǵy ret 3 naýryz kúni ol Ertistiń ortalyǵynan aǵys alyp ketip, qaırańǵa turyp qalǵan, sol joly kemeniń trıýmine zaqy keldi. Biraz ýaqyttan soń ony qaıtadan jaǵaǵa súırep ákelip, 260 metrlik temir arqanmen jaǵaǵa bekitti.
Eske sala ketsek, 18 sáýir kúni Óskemen GES-tiń sýdy azaıtý josparyna sáıkes, 997 tekshe metr sý aǵyzyldy. Sol joly qatty aǵys kesirinen debarkaderdi jaǵaǵa bekitken temir arqan úzilip, júzbe nysan jaǵalaýǵa zaqym keltirdi.
