Óskemende júıkege áser etetin zattardy saýdalaǵan erli-zaıypty ustaldy

ÓSKEMEN. QazAqparat – Óskemen qalasynda psıhotroptyq zattardy saýdalaǵan erli-zaıyptylarǵa qatysty qylmystyq is qozǵaldy, dep habarlaıdy QazAqparat tilshisi.

ShQO Polıtsııa departamenti baspasóz qyzmetiniń málimetine súıensek, 22 jáne 23 jastaǵy erli-zaıyptylar Óskemen qalasynyń ortalyǵynda páter jaldap, áleýmettik jeliler arqyly esirtki saýdasymen aınalysqan.

«Belgili bolǵandaı, olar oblys ortalyǵyna Semeı qalasynan kelgen. Polıtsııa qyzmetkerleri kúdiktilerdiń turǵylyqty jeri boıynsha tintý júrgizý barysynda elektrondy tarazylardy, jarty mıllıon teńgege jýyq aqsha jáne psıhotroptyq zattar salynǵan polıetılen paketterdi tárkiledi», - delingen habarlamada.

Zańsyz jolmen paıda tapqan áıeli men kúıeýi ózderiniń ár qadamyn aldyn ala josparlap alǵan. Esirtki satýdan túsken aqsha otbasylyq bıýdjetke quıylyp otyrdy. Osylaısha olar eki aı kóleminde esirtki saýdalaǵan.

«Jalpy alǵanda, esirtki satýshylardan «krıs» jáne «mef» dep atalatyn 700-den astam bir rettik psıhotroptyq zat tárkilendi. Onyń «qara naryqtaǵy» baǵasy 6 mıllıon teńgeden asady», - dedi ShQO PD bastyǵynyń orynbasary Talǵat Shaıahmetov.

Qazirgi ýaqytta erli-zaıyptylar Óskemen qalalyq PB ýaqytsha ustaý ızolıatoryna qamaýǵa alynǵan. QR Qylmystyq Kodeksiniń 297-baby 3-bóligine sáıkes sotqa deıingi tergeý amaldary júrgizilýde. Kúdiktiler zań boıynsha 15 jylǵa deıin bas bostandyǵynan aıyrylýy múmkin.