Óskemende júrgizýshi kýáligine emtıhan tapsyrǵandardan 40 mln teńge syıaqy alǵan HQO qyzmetkerleri sottaldy

ÓSKEMEN. KAZINFORM – Óskemen qalasynda mamandandyrylǵan HQO qyzmetkerleri júrgizýshi kýáligine emtıhan tapsyrǵandarǵa kómek kórsetemiz dep 40 mln teńgege jýyq syıaqy alǵan. Alaıda bul zańsyz áreketteri áshkere bolyp, sotqa tartyldy.

Qalalyq №2 sotta «Azamattarǵa arnalǵan úkimet «memlekettik korporatsııasy» KE AQ ShQO boıynsha fılıaly Óskemen qalalyq mamandandyrylǵan HQO-nyń 3 qyzmetkerine qatysty qylmystyq is qaraldy.

«Anyqtalǵandaı, ortalyq basshysy men eki qyzmetker 2023 jyldyń aqpan-qazan aılary aralyǵynda júrgizýshi kýáligine emtıhan tapsyrǵandarǵa kómek kórsetemiz dep 40 mln teńgege jýyq zańsyz syıaqy alǵan. Sot barysynda aıyptalýshylar óz kinálaryn tolyqtaı moıyndap, qatty ókinetindikterin jetkizdi», - dep habarlady sottyń baspasóz qyzmeti.

Sot úkimimen fılıaldyń burynǵy basshysy men bir qyzmetkeri 500 AEK (1 725 000 teńge) kóleminde aıyppul tóleýge mindettelip, 1 jylǵa memlekettik jáne kommertsııalyq emes uıymdarda basshylyq qyzmetterdi atqarý quqyǵynan aıyryldy.

Al taǵy bir qyzmetkerden qylmystyq jolmen alynǵan aqshaǵa satyp alynǵan páteri tárkilenip, úsh jyl merzimge bas bostandyǵyn shekteý jazasy taǵaıyndaldy. Úkim áli zańdy kúshine engen joq.

Eske salsaq, osyǵan deıin Óskemende belgili sportshyny atyp ketken er adamnyń jazasy qatańdatylǵany habarlanǵan.