Óskemende Jumysshy mamandyqtary jyly aıasynda Workshop alańy uıymdastyryldy
ASTANA.KAZINFORM - Memleket basshysy Qasym-Jomart Toqaev jumysshylardyń bedelin arttyrý jáne eńbek naryǵynda suranysqa ıe mamandardy daıarlaý úshin 2025 jyldy «Jumysshy mamandyqtary jyly» dep jarııalady.
Óskemendegi «Mamandyǵym – Maqtanyshym» Workshop alańy mektep oqýshylary, stýdentter, kolledjder, joǵary oqý oryndarynyń ókilderi men oblys kásiporyndarynyń basyn qosqan biregeı sharaǵa aınaldy.
Іri kompanııalardyń qyzmetimen jáne bilim berý baǵdarlamalarymen syndarly dıalog formatynda tanysý ótti. Búgingi tańda óńirdiń tehnıkalyq jáne kásiptik bilim berý júıesinde 101 mamandyq boıynsha kadr daıyndaıtyn 38 kolledj bar.
Aıta ketý kerek, dál Shyǵys Qazaqstanda dýaldy bilim berý baǵdarlamasy pılottyq rejımde júzege asyrylýda. Oǵan oblystaǵy 27 kolledj ben 400-den astam kásiporyn qatysyp jatyr. Baǵdarlamanyń ádettegi oqý úderisinen basty aıyrmashylyǵy – oqý protsesinde alǵan teorııalyq bilimdi praktıkada tikeleı qoldaný múmkindigi. Sondaı-aq 100-250 myń teńgege deıin jalaqy beriledi.
Oblys ákimi Nurymbet Saqtaǵanov atap ótkendeı, Shyǵys Qazaqstanda jumysshy mamandyqtar tizimi kadr qajettiligine qaraı kóbeıetin bolady. Osylaısha, jaqyn arada oblystaǵy kolledjderde «Qurylystaǵy smetalyq esep», «Logıstıka», «Qashyqtan basqarylatyn ushaq júıesi», «Jańartylatyn energııa kózderi», «Áýe tasymalyn uıymdastyrý» syndy mamandyqtar boıynsha oqytý bastalady.
Semınar barysynda mektep oqýshylary men abıtýrıentter oqý sharttarymen jáne jumysqa ornalasý múmkindikterimen tanysty. Bul olardyń bolashaq mamandyǵyn tańdaýǵa zor septigin tıgizedi.
- Oqý jylynyń aıaqtalýyna óte az ýaqyt qaldy. Suranysqa ıe bolý úshin qandaı mamandyq tańdaý kerektigin jaqsylap oılaný kerek. Búgingi tańda jumysshy mamandyqtardyń bedeli joǵary. Olar ekonomıkalyq damýdyń negizi sanalady. Barlyǵyńyzǵa ómirde óz oryndaryńyzdy taýyp, sapaly bilim alýda sáttilik tileımin, - dedi Nurymbet Saqtaǵanov.
Aıta keteıik, Shyǵys Qazaqstan aýdandarynda kadrlardy daıarlaý jáne qaıta daıarlaý kýrstary ashylyp, jumyssyzdarǵa erekshe kóńil bólinedi. Óńirde memlekettik qoldaý belsendi túrde qoldanylyp keledi. Jumys oryndaryn ashatyn jańa kásiporyndar qurylyp jatqandyqtan, mundaı kýrstar aýyldyq jerlerde jumyspen qamtýdy qamtamasyz etý úshin múmkindik beredi.
«Tamaqtandyrýdy uıymdastyrý», «Dánekerleý isi», «Elektr jabdyqtary», «Esep jáne aýdıt» sııaqty mamandyqtar boıynsha bilim alýǵa múmkindik beretin Mobıldi oqý ortalyǵy aýyldyq jerlerde de jumysyn jalǵastyrady.
Sonymen qatar aımaq basshysy Nurymbet Saqtaǵanovtyń aıtýynsha, Shyǵys Qazaqstan oblysynda jumys istep jatqan mamandardy qoldaý sharalary da júzege asyrylýda. Osylaısha, óńirde kadr máselesin sheshý, jylý energetıkasy salasyna bilikti mamandardy tartý jáne oǵan suranysty arttyrý maqsatynda 2024 jyldan bastap alǵash ret «Otbasy bankimen» birlesip, «Shyǵys Mamany» jeńildetilgen ıpotekalyq baǵdarlamasy pılottyq rejımde iske qosyldy.
