Óskemende jumys ýaqyty 1 saǵatqa shegerildi

ÓSKEMEN. KAZINFORM — Óskemen qalasynda jumys ýaqyty ózgerdi.

20 naýryzdan bastap Óskemende memlekettik organdar men bıýdjettik uıymdar jańa jumys kestesine kóshedi. Bul týraly qala ákimdiginde ótken jıynda Shyǵys Qazaqstan oblysy ákiminiń orynbasary Darhan Sapanov málim etti.

Endi jumys kúni saǵat 08:00–de bastalyp, 17:30–da aıaqtalady, túski úzilis 12:00–den 13:30–ǵa deıin.

Osylaısha bul jańashyldyq oblystyń barlyq qala, aýdanynda engizilip otyr. Jańa jumys rejımine kóshý turǵyndardyń ómir súrý sapasyn jaqsartady dep kútilýde.

— Jańa jumys ýaqytyn talqylaýǵa arnalǵan jıynǵa qaladaǵy memlekettik uıymdardyń ókilderin qosqanda 300-ge jýyq adam qatysty. Talqylaý barysynda jınalǵandar jumys kúnin erte bastaýdyń yńǵaılylyǵyn atap ótip, jańa ózgeristerdi qoldaıtyndyqtaryn jetkizdi. Óskemen — Shyǵys Qazaqstan oblysynda osy jumys kestesin engizý týraly sheshim qabyldaǵan sońǵy qala boldy, — dep habarlady óńir ákimdiginen.

Eske salsaq, osyǵan deıin Rıdder qalasynda jumys ýaqyty bir saǵatqa shegerilgeni habarlanǵan.