Óskemende jolǵa tóselgen bıtýmnan kólik dóńgelekteriniń búlinýi: merdiger men júrgizýshiler kelisimge keldi

ÓSKEMEN. KAZINFORM — Óskemen qalasynda kólik júrgizýshileri jolǵa tóselgen bıtýmnyń dóńgelekti búldirgenine shaǵymdanǵan bolatyn. Qazir olar merdigermen kelisimge keldi.

Tamyz aıynyń ortasyna taman qaladaǵy Qabanbaı batyr kóshesimen kele jatqan avtokólik júrgizýshileri barar jerine jetpeı toqtaýǵa májbúr bolǵan edi. Sebebi asfalt tóseý jumystary kezinde jańbyr jaýyp ketip, kólik dóńgelekteri bıtýmǵa batyp, búlinip qalǵan.

Búginde másele oń sheshimin tapty. Bul týraly qalalyq turǵyn úı-kommýnaldyq sharýashylyq bóliminiń basshysy Erjan Ibraev málim etti.

— Barlyǵy 5 kólik júrgizýshisi shaǵym túsirdi. Merdiger men sol kólik ıeleri arasynda azamattyq is boıynsha másele retteldi. Qazir turǵyndar tarapynan shaǵym joq, — dedi ol.

Eske salsaq, osyǵan deıin Óskemende kólik júrgizýshileri jolǵa tóselgen bıtýmnyń dóńgelekti búldirgenine shaǵymdanǵany habarlanǵan.