Óskemende jolaýshylar avtobýsynan órt shyqty
ASTANA. QazAqparat - Óskemende qozǵalys ústindegi jolaýshylar avtobýsynan órt shyqty. Oqıǵa búgin tańerteń Áýezov dańǵylynda boldy, dep habarlaıdy QazAqparat YK-news.kz saıtyna silteme jasap.
ShQO Tótenshe jaǵdaılar departamentiniń baspasóz qyzmetinen málim etkendeı, jalyn az ýaqytta aýyzdyqtalǵan.
King Long markaly avtobýs Úlbi kópirine qaraı Áýezov - Jeńis dańǵyldarynyń qıylysy tusynda kele jatqan. Kenetten tútin shyǵa bastaǵan. Júrgizýshi kólikti toqtatyp, jolaýshylardy evakýatsııalady.
Oqıǵa ornyna jedel jetken órt sóndirýshiler qaýipti joıdy. ShQO TJD baspasóz qyzmetiniń aqparatyna sáıkes, tilsiz jaý 0,5 sharshy metrdi sharpyǵan. Órt avtobýstyń akkýmýlıator bóliginen shyqqany anyqtaldy.
