Óskemende jol apatynan zardap shekken moped júrgizýshileriniń jartysy — kámeletke tolmaǵandar

ÓSKEMEN. KAZINFORM – Óskemen qalasynda moped júrgizýshilerimen bolatyn jol apattary kúrt kóbeıip ketti. Sol apattardan zardap shekkenderdiń jartysy kámelettik jasqa tolmaǵandar.

Qalalyq PB baspasóz qyzmetiniń málimetine súıensek, jyl basynan beri Óskemende moped pen skýter júrgizýshileriniń qatysýymen bolatyn jol-kólik oqıǵalarynyń sany kúrt kóbeıip ketti.

«Bul qala joldarynda jyl saıyn eki dóńgelekti kólikter sanynyń artýyna jáne moped júrgizýshileriniń avtokólik júrgizýshilerine qaraǵanda jol qozǵalysy erejelerin durys saqtamaıtyndyǵyna qatysty bolyp otyr. Jol apattarynyń kóbeıýine kámeletke tolmaǵandardyń moped tizgindeı bastaýy da tikeleı áser etýde», - delingen aqparatta.

Bıyl qala boıynsha mopedter men skýterlerdiń qatysýymen 70-ke jýyq jol-kólik oqıǵasy tirkeldi. Bul ótken jylǵy kórsetkishpen salystyrǵanda birneshe ese kóp.

«Jol apattary saldarynan 79 adam zardap shekse, onyń 39-y kámeletke tolmaǵandar. Sondaı-aq tártip saqshylary 150-ge jýyq jol erejesin buzǵan moped jáne skýter júrgizýshilerin anyqtady», - deıdi qalalyq PB jol-kólik oqıǵasy bóliminiń bastyǵy Sergeı Kovalenko.

Eske salsaq, osyǵan deıin Abaı oblysynda jol apattarynyń sany eki ese artqany habarlanǵan.