Óskemende jol apatynan eki adam kóz jumdy
ÓSKEMEN. KAZINFORM — Óskemen qalasynda jol-kólik oqıǵasynan eki adam qaza boldy.ShQO polıtsııa departamenti baspasóz qyzmetiniń málimetine súıensek, jol apaty Maldybaev kóshesinde bolǵan.
— Aldyn ala derekterge sáıkes, 35 jastaǵy er adam Honda Inspire markaly kólikti aıdap áketken. Maldybaev kóshesi arqyly qalaǵa kirip kele jatqanda qarsy jolaqqa shyǵyp ketip, Mersedes-Benz kóligimen soqtyǵysty, — dep habarlady vedomstvo ókilderi.
Sonyń saldarynan eki júrgizýshi de oqıǵa ornynda kóz jumdy. Oblystyq polıtsııa departamenti anyqtaý basqarmasynyń bastyǵy Arman Úmitovtiń aıtýynsha, Mersedes-Benz kóliginiń jolaýshysy túrli jaraqatpen aýrýhanaǵa jetkizildi.
Qazir atalǵan faktige baılanysty tergeý bastalyp, oqıǵanyń mán-jaıy anyqtalyp jatyr.
Eske salsaq, osyǵan deıin Aqtóbede jol apatynan júrgizýshi qaza tapqany habarlanǵan.
